Гъэсэгъэшхуагъ, кIэлэегъэджэ дэгъугъ
1925-рэ илъэсым, Кощхьэблэ районымкIэ къуаджэу Еджэркъуае Мыщынэ Асиет къыщыхъугъ.
Къоджэ еджапIэм дэгъоу щеджагъ. Нэужым яунагъокIэ Краснодар кощыжьыгъэх. ЕджапIэр къызеухым клубым Iоф щишIагъ — иорэдыIуагъ. Мэкъэ гохь лъэкIыхьагъэ иIагъ. 1948 — 1952-рэ илъэсхэм Мыщынэ Асиет Тбилисскэ музыкальнэ училищым орэдкъэIонымкIэ, Ольга Шульгина-Инашвили ипедагогэу, зыщигъэсагъ. Училищым икIэлэегъаджэхэм Асиет зэчый ин зэрэхэлъым гу лъатагъэу, иеджэн Тбилисскэ консерваторием щылъигъэкIотэнэу къыраIуагъ, ау мы уахътэм орэдкъэIон отделением грузиныбзэкI зэрэщырагъаджэщтыгъэхэр. Ащ къыхэкIыкIэ Асиет Мыекъуапэ къэкIожьы ыкIи исэнэхьаткIэ Iоф ышIэу регъажьэ. Илъэс тешIагъэу Ленинград консерваторием чIэхьагъ, профессорэу Вера Ильинична Павловская-Боровик ригъэджагъ, къыухыгъ.
Бзылъфыгъэр унагъо ихьагъ, ишъхьэгъусэ агрономыгъ, мэкъумэщ шIэныгъэхэмкIэ докторыгъ, ащ къыхэкIэу бэрэ кощынхэ фаеу хъущтыгъэ. Мыщынэ Асиет Мыекъуапэ Iоф щешIэ, етIанэ Алма-Атинскэ музыкальнэ училищым (1965 — 1970) щылэжьагъ, Алма-Атинскэ опернэ театрэм Iухьан мурад иIэу дэгъоу зыкъиушыхьатыгъ, ымакъи къедэIугъэх, ау унагъор зыпшъэ илъ бзылъфыгъэм ежь зэрэшIоигъуагъэу изэчый ыгъэфедэнэу ыкIи оперэмкIэ игугъэ пхырищынэу хъугъэп, ау щэч хэмылъэу, орэдыIо ыкIи кIэлэегъэджэ дэгъу дэдагъ.
1970-рэ илъэсым ихэку къыгъэзэжьи, щэIэфэкIэ Мыекъопэ музыкальнэ училищым вокалымкIэ икIэлэегъэджагъ, цIыфышIугъ. Асиет лъэпкъ искусствэм, музыкэм ыкIи орэдкъэIуакIэм бэ афигъэсагъэр.
Мыщынэ Асиет гъэсэныгъэ-шIэныгъэ дэгъу ыкIи егъэджэкIэ амал ин зыIэкIэлъыгъэ педагогыгъ, лъэпкъ искусствэм щылэжьэщт ныбжьыкIэхэу музыкэр зикIасэхэр егугъоу ригъэджагъэх, арышъ, адыгэ музыкальнэ культурэм иIахь гъэнэфагъэ зэрэхэлъыр хэти ышIэн фае. ЫгукIи ыпсэкIи ар цIыф къэбзагъ, дэхагъ, зэфагъ къызэраIотэжьырэмкIэ, кIэлэегъэджэ пэрытыгъ, ригъэджагъэхэм лъэгъошIу джы щыIэныгъэм щыпхыращы, якIэлэегъэджэ пэрытыгъэу Мыщынэ Асиет ыцIи сыдигъуи шIукIэ раIо. Лъэпкъ музыкальнэ искусствэм кIэлэегъэджэ цIэрыIом ыцIэ пытэу епхыгъагъ, ишIушIэгъэ ин ащ хэхьагъ, щыIагъэмэ ыныбжь илъэси 100 хъущтыгъэ, къыгъэшIагъэр илъэс 61-рэ, ар зи арыхэп, ау шIоу бэ ащ ыпхъыгъэр.
Мамырыкъо Нуриет.