Илъэсым иохътиплI ахэбдзын гори ахэмытэу шIэгъо закI, ау анахь гур зыщэфырэр, апэрэ гъэтхэпэ тыгъэ нэбзыйхэр арых. Сабый кIогъакIэу, ахэр фэсакъэу хэуцох, шъыпкъэ, фабэп джыри дунаир, ауми, мэфэ нэгу ихыгъэхэм зэхэпшIапэу гур агъэшIу.

Гъатхэм дунаир дэкIэжьы: нэфылъыр нахь пасэу къызэIуе­хы, мафэм икIыхьагъэ хэхъо, Iоф зиIэр щысырэп — мапхъэ, матIэ; чIыгум хэбгъэтIысхьэрэ щыIэмэ фабэм икъэкIогъу, нэрэ-Iэрэм зыкъепхъуатэ. ДжырэкIэ гъэтхапэр ылъэ теуцо къодый, ауми, изы мэфэ тыгъэпс ини цIыкIуи, къолэбзыухэми, нэ­мыкI псэ зыпытхэми агу къыдещае. Къэфэбэгъэ пчэдыжьыпэ ошIум бзыу орэдым зыкъыщештэ, цIыф­хэри нахь къэчэфыжьыгъэ­хэу, хэти иIоф мыухыжь зэрэригъэкъущтым пылъ.
ЕджэкIо цIыкIухэу ублэпIэ еджапIэм кIохэрэр кулы-сылы аIоу, дунаир къаIушIыкIэу блэзэрэхых, нахьыжъэу апэ къи­фэ­хэрэм гушIохэзэ сэлам ара­хы, хъупхъэх. Портфелэу акIыб илъыр мышъэ исым фэдэу джа­­дэ, зэкIэ яIэ пстэур — тхы­лъи, тетради, ручки, карандаши даугъуаешъ ары. Ау къэлэпчъэ Iупэм щыт нанэр гъэ­псэфыгъо мафэхэр зяIэщтымкIэ къызяуп­чIым, зэдырагъаштэу, «гъэтхапэм ыкIэр ары» раIуагъ, Iушы­жъыех, адыгабзэри урысыбзэри дэгъоу ашIэ. КIэлэцIыкIу чэфы­лэ­хэм уяплъ къодыеми гур къы­дащае, сабыйхэр пшъхьа­пэба!
Гъэтхапэр мэфэкIхэмкIэ бай: анахь мэфэпчъым къыщыхэгъэ­щыгъэр — гъэтхапэм и 8-р — зэрэдунай тет бзылъфыгъэхэм, Ным, бзылъфыгъэм, шыпхъум, шъхьэгъусэм, нанэхэм я Маф. ХэткIи мы мафэр мэфэкI ин, къэгъэгъэ Iэрамхэр мокIэ-мыкIэ ашIоIофэу ини цIыкIуи бэу щызэрахьэх. ГушIогъуаби хэлъ, сыда пIомэ, Ным-бзылъфыгъэм фэмышIапхъэ щыIэп. КIэлэцIыкIу, пшъэшъэцIыкIу Iушыжъыехэм «5-р» бэу къахьы ыкIи ащкIэ агъэгушIох якIэлэ­егъа­джэхэри, янэ-ятэхэри. Къеб­лагъ, гъатхэр! — тэIо. Гъэтхэ мафэ Хэгъэгушхоми, тиреспублики, тицIыфхэми афэхъунэу, тигугъэ лъагэхэм хэти талъыкIэхьанэу тэлъаIо.