Загъорэм, зыкIэхъурэри къэшIэ­гъуаеу, тиадыгабзэ тэр-тэрэу зэхэтэлъашъо: сабый кIогъакIэм ыкIи нахь такъырыIом е илъэси 7 — 10 зыныбжьым «губзыгъэкIэ» тяджэ, ау нахь тэрэзыр «Iушыжъый» пIоныр арэу сэлъытэ.
«Губзыгъэр» зытефэу зифэшъуашэр, акъылышIо дэдэу, зэкIэ дунаими, щыIакIэми, цIыфхэми ахэлъ-ахэсыр зышIэу, купкI иIэу гущыIэ пэпчъ къизыIотыкIырэр ары.ащ фэдэ Iуш дэдэхэр гъашIэ зыгъэшIагъэх, хэлъ-хэсыр икъоу зыушэтыгъэх. Мыхэм яапэрэ сатыр хэхыгъэ хэт адыгэ тхэкIо цIэрыIоу МэщбэшIэ Исхьакъ.
Ащ ипоэзие мы аужырэ илъэсхэм джыри зы лъэныкъуакIэкIэ гъэзагъэ хъугъэ — «СатыриплIхэр» — цIэу ежь И. МэщбашIэм афишIыгъэр. Ахэр ухэт­ми убзэ ыкIи лъэпкъ шэн-хабзэхэр, шIыкIэ-IуакIэхэр зыфэдэхэр — дэгъур, дэир зэхэугуфыкIыгъэу озгъашIэрэх.

ПаIор напэшъ, зыщымых,
Адыгагъэм удэмых.
ПаIор пшъхьэмэ, шъхьэм егъапш,
Джаущтэу пшIэмэ, улIы пхъаш.

ШъхьэфэгъэшIо тэдж зышIырэм
ЫпхэкI пызрэп,
Адыгагъэм рымыпшъырэм
Ылъапсэ сысрэп.

УиIофшIагъэ шIушIэ хэлъмэ,
КъэбгъэшIагъэр насыпыгъ.
Ау джы нэсы ар гухэлъмэ,
ПшIэгъэ пстэури пIэпызыгъ.
МэщбэшIэ Исхьакъ и «СатыриплI­хэр» купкI зиIэх, щыIэныгъэр зыфэдэр къыозыIуатэрэх. Ахэр тхылъ инитIум зэрадафэу къыдигъэкIыгъэх, шъуядж, зэжъугъашIэх дэгъури дэйри.