Урысые Федерацием и Президент и Полномочнэ лIыкIоу Къыблэ федеральнэ шъолъырым щыIэм дэжь щызэхэщэгъэ Советым изэхэсыгъо зыщатегущыIагъэхэр машIом зыкъемыгъэштэгъэнымкIэ, псыхэр къызщыдэкIыхэрэ лъэхъа­ным ошIэ-дэмышIэгъэ тхьамыкIа­гъохэр нахь макIэ шIы­гъэнхэмкIэ Iофтхьэбзэ тедзэхэу зэрахьащтхр ары. Зэхэсыгъор зэрищагъ УФ-м и Президент и Полномочнэ лIыкIоу Къыблэ федеральнэ шъо­лъырым щыIэ Владимир Устиновым.

Iофтхьабзэм хэлэжьагъэх Урысыем ошIэ-дэмышIэгъэ IофхэмкIэ и Министерствэ, Урысыем тыкъэзыуцухьэрэ дунаим икъэухъумэнкIэ и Министерствэ ялIыкIохэр, Къыблэ федеральнэ шъолъырым хахьэхэрэм япащэхэр. Адыгеим ыцIэкIэ ащ хэлэжьагъ республикэм и ЛIышъхьэу КъумпIыл Мурат.
Владимир Устиновым къызэриIуагъэм­кIэ, илъэсэу икIыгъэм Къыблэ федеральнэ шъолъырым мэшIо лъэпкъ зэфэ­шъхьафхэу зыкъыщызыштэгъагъэхэм апкъ къикIэу сомэ миллиард 1,5-рэ фэдиз зэрарэу ахьыгъ. ЧIыгу гектар мини 8-мэ атет мэзыр кIодыгъэ. Нэбгырэ 680-м ехъур машIом хэкIодагъ. УплъэкIунэу зэхащагъэхэм нафэ къызэрашIыгъэмкIэ, машIом зыкъымыштэнымкIэ шапхъэу щыIэхэр гъогогъу мини 4,5-м ехъурэ укъуагъэ хъугъэх.
ХэушъхьафыкIыгъэу къызэрэхагъэщыгъэмкIэ, дзэ операциер къызежьагъэм къыщыублагъэу Къыблэ федеральнэ шъолъырым къыщыхъурэ гумэкIыгъохэм къахэхъуагъэх цIыф зэрымыс аппаратхэр пыим ыгъэфедэхэзэ мыхъо-мышIагъэхэр зэрихьэхэу зэрэригъэжьагъэм къыкIэкIуагъэхэр.
«Илъэсэу икIыгъэм Къыблэ федеральнэ шъолъырым къыщыхъугъэ тхьамыкIагъохэр зыпкъ къикIыгъэхэр Украинэм террористическэ бзэджэшIагъэу гъэстыныпхъэ-энергетическэ комплексым, дзэ ыкIи граждан инфраструктурэм, мэз ыкIи мэкъумэщ хъызмэтым япхыгъэ псэуалъэхэм ащызэрихьагъэхэр ары», — къыIуагъ Владимир Устиновым.

Псыхэр къызэрэдэкIыхэрэм иIоф зынэ­сым Владимир Устиновым къызэрэкIигъэтхъыгъэмкIэ, нэбгырэ миллион фэдиз зыщыпсэурэ псэупIэ пункт 1200-м ехъумэ гъэтхэ лъэхъаным псыр къакIэоным ищы­нагъо ашъхьащыт. Анахьэу ащ ынаIэ зытыридзагъэр гидротехническэ псэуа­лъэхэу зыми фэмыгъэзагъэхэм яIофыгъу ары. Ахэм псыр зэрыкIон фаехэмкIэ пэрыохъухэр ыкIи псым зыкъыIэтынымкIэ гумэкIыгъохэр къатых.
Мы IофыгъохэмкIэ къэгущыIагъэх Урысыем ошIэ-дэмышIэ IофхэмкIэ и Министерствэ ипащэ игуадзэу Анатолий Супруновскэр, псыкъэкIуапIэхэмкIэ Урысыем и Министерствэ ипащэ игуадзэу Вадим Никаноровыр, джащ фэдэу Къыблэ федеральнэ коим къыхиубытэрэ шъолъырхэм ягубернаторхэр. ЧIыпIэхэм япащэхэм анаIэ нахь зытырадзэн фэе Iофыгъоу къэуцугъэхэмкIэ щыкIагъэу афалъэгъухэрэр араIуагъэх, ахэм ядэгъэ­зыжьынкIэ ашIэн фаехэри афагъэнэфагъэх.
УФ-м и Президент и Полномочнэ лIыкIо шъолъырхэм машIом закъыщимыштэнымкIэ Iофтхьабзэу ащызэрахьан фаехэм мэхьанэшхо зэряIэр къыхигъэщыгъ, 2025-рэ илъэсым, псыхэм якъыдэкIын ищынагъо къызщыуцурэм, ищыкIэгъэ шапхъэхэр къыдалъытэнхэ зэрэфаер къыIуагъ.
Илъэсэу икIыгъэм ошIэ-дэмышIагъэ зыхэлъ тхьамыкIагъохэу машIом епхыгъэхэм афэдэ Адыгеим щагъэунэфыгъэп. МашIом гъогогъу 1972-рэ зыкъыштэу къыхэкIыгъ, ахэм нэбгырэ 17 ахэкIодагъ, нэбгырэ 11-мэ фыкъуагъэхэр яIэ хъу­гъэх. ЧIыгу гектар 4,9-м тет мэзхэм псынкIэу машIор ащагъэкIосэн алъэкIыгъ. Дронхэр агъэфедэхэзэ машIом зыкъызыщиштэн ылъэкIыщтгъэгъэ чIыпIэ 227-рэ къаухъу­магъ.
2025-рэ илъэсым, а лъэныкъомкIэ гумэкIыгъохэр нахьыбэ зыщыхъухэрэ чэзыум, ошIэ-дэмышIагъэ зыхэлъ тхьамыкIагъохэр къэмыхъунхэм фэгъэзэгъэ кIуачIэхэмрэ амалхэмрэ язытет ауплъэ­кIущт, гъэтхапэм и 20-м нэс ар аухыщт. ЗэкIэ къулыкъухэр мы лъэныкъомкIэ зэдеIэжьынхэу рахъухьагъ. Мэзхэм ма­шIом закъыщимыштэным ыкIи мэкъумэщ псэуалъэхэр щынэгъончъэнхэм апае план гъэнэфагъэхэмрэ «гъогу картэкIэ» за­джэхэмрэкIэ зэхагъэуцуагъэх.
2024-рэ илъэсым игъатхэ псыр чIыпIэ зэфэшъхьафхэм къащыкIэогъагъэми, ошIэ-дэмышIагъэ зыхэлъ тхьамыкIагъохэм анэсыгъэхэп. Кощхьэблэ районымкIэ псыхъоу Лабэ игъэкIотыгъэ гъэцэкIэжьын­хэр дамбитIумэ щарашIылIагъэх. Шэуджэн районымкIэ псыхъоу Джаджэ инэпкъ километрэ 1,1-рэ аукъэбзыгъ, псыхъоу Фарзэ идамбитIу агъэцэкIэжьыгъ. Джэджэ районым ипсэупIэу Гончаркэм игидропсэуалъэ игъэкIотыгъэ гъэцэкIэжьынхэр рашIылIагъэх. Ащ фэдэ псэолъэ 60-м ехъоу зыми фэмыгъэзэгъагъэхэр муниципальнэ мылъку ашIыжьыгъэх.
2025-рэ илъэсым псыкъыдэкIыным зэрарэу къыхьырэр джыри нахь макIэ шIыгъэным пае Джэджэ ыкIи Мыекъопэ районхэм япсыхъохэу Джаджэмрэ Курарэ янэпкъхэр аукъэбзыщтых. Псыхъоу Лабэ идамбитIумэ игъэкIотыгъэ гъэцэкIэжьынхэр арашIылIэнхэу рахъухьагъ, Джэджэ ыкIи Шэуджэн районхэмкIэ зыми фэмыгъэзэгъэ гидротехническэ псэолъитIур амыгъэфедэжьынхэу ашIыщтых.

АР-м и ЛIышъхьэ ипресс-къулыкъу къытырэ къэбархэмкIэ
Тхьаркъохъо Сафыет.