ХэушъхьафыкIыгъэ дзэ операцием иветеранхэм станицэу Джаджэм икIэлэеджакIохэр защыIукIэгъэхэ зэхахьэ культурэм и Унэу псэупIэм дэтым щыкIуагъ.

ЗэIукIэгъум хэлэжьагъэх ЛIы­хъужъныгъэм иорден икавалерэу, Джэджэ район къэзэкъ обществэм хэтэу Алексей Фаб­рицкэр ыкIи Мыекъопэ къэзэкъ отделым иатаман игуадзэу, Урысые обществэу «ШIэныгъэм» илекторэу Александр Роговыр.
ХэушъхьафыкIыгъэ дзэ операцием хэлэжьэнхэу унашъо зыфашIыжьыным ахэр къызэ­рэфэкIуагъэхэр ыкIи Хэгъэгум икъэухъумэн епхыгъэ пшъэрылъхэм ягъэцэкIэн зэшIуахы зэ­хъум къиныгъоу зэолIагъэхэм кIэлэ­еджакIохэр щагъэгъозагъэх.
ЗэуапIэм Iут дзэкIолIхэм ящы­IэкIэ-псэукIэ зыфэдэм, Iа­шэу щагъэфедэхэрэм, гъунапкъэхэр ухъумэгъэнхэмкIэ шIыкIэ-амалхэм афэгъэхьыгъэ уп­чIэхэр кIэлэеджакIохэм къатыгъэх. Ветеранхэм мэхьанэшхо ратэу хагъэунэфыкIыгъэр кIэлэеджакIохэм яписьмэхэу къа­IукIэщтыгъэхэм гушхуагъэ къа­зэрахалъхьэщтыгъэр, ахэр IэпыIэгъу къазэрафэхъущтыгъэр ары.
УIагъэхэм медицинэ IэпыIэгъур псынкIэу зэрябгъэкIын плъэкIыщтым ишIыкIэ-амалхэр Александр Роговым зэIукIэгъум къыщигъэлъэгъуагъэх. КIэухым хэушъхьафыкIыгъэ дзэ опе­рацием щыIэхэм апае кIэлэ­еджакIохэм аугъоигъэ шIушIэ IэпыIэгъур ветеранхэм аратыгъ. Хэгъэгур къэзыухъумэхэрэм ар анагъэсыжьыщт.
ЛIэужхэр зэзыпхырэ ыкIи Хэгъэгум къулыкъу фэпхьыным имэхьанэ къэзыIэтырэ зэIукIэгъоу ар хъугъэ. Непэрэ мафэхэм лIыгъэ зезыхьэхэрэр къыткIэхъу­хьэрэ лIэужхэм ашIэнхэ фае.
Анастасия Нетребина.
Мыекъопэ къэзэкъ отделым ипресс-къулыкъу.