Мэз чэтыуа хьаумэ..?
БлэкIыгъэ мафэхэм Мыекъопэ районым ипсэупIэу Тульскэм мэз чэтыум фагъэдэгъэ псэушъхьэ щагъэунэфыгъ. ХьакIэ-къуакIэм псэупIэм къыщичъыхьэу камерэм къыридзагъ. Ащ фэшъхьафэу шхафэ хъугъэ псэушъхьэхэм якъупшъхьэхэри, лъэужхэри цIыфхэм къагъотыгъэх. Ахэр къизыгъэлъэгъукIырэ видеохэр дунэе хъытыум къихьагъэх. Мэз чэтыуа хьаумэ нэмыкI псэушъхьа? ДжырэкIэ теубытагъэу специалистхэм къаIошъурэп, ащ фэгъэзэгъэ къулыкъухэм зэхэфынхэр ашIых.
Янина Реенсон — Кавказ биосфернэ заповедникым ипресс-секретарь:
— ВидеомкIэ псэушъхьэр зыщыщыр гъэунэфыгъуае. Экологием игумэкIыгъохэмкIэ институтыр джырэкIэ а упчIэм дэлажьэ. Арышъ, ащ къыIощтым тежэ.