Iахьзэхэлъ обществэу «Россети Кубань» Адыгэ РеспубликэмкIэ икъутамэ иэнергетикхэм 2025-рэ илъэсыр къызихьагъэм щегъэжьагъэу электроэнергиер зэрыкIорэ линие километрэ 68-рэ фэдиз агъэцэкIэжьыгъ. Краснодар краимкIэ Апшеронскэ, Шытхьэлэ районхэм, Адыгэ РеспубликэмкIэ Джэджэ, Мыекъопэ, Красногвардейскэ, Кощхьэблэ, Шэуджэн районхэм япсэупIэхэм, Мыекъуапэ къыпэIулъ псэупIэхэм электроэнергиер ахэм аIэкIагъахьэ.
Специалистхэм изолятори 180-рэ, пкъэу 200-м ехъу, жъы хъугъэ гъучIыч километрэ 15 фэдиз зэблахъугъ. Ащ фэдэ гъучIычхэр нахь щынэгъончъэх, нахьыбэрэ агъэпсэолъэшъущтых, нахь цыхьэшIэгъух. Электроэнергиер зэрыкIорэ линиехэр зэщымыкъонхэм пае къаухъумэрэ шъолъырхэу гектар 50-м ехъу зэлъызыубытыхэрэм чъыгхэмрэ куандэхэмрэ араупкIыгъэх. Апшеронскэ, Мыекъопэ районхэм якъушъхьэлъэ, ямэзылъэ чIыпIэхэм арыкIорэ линии 6-мэ яIэгъо-блэгъухэм къащыкIырэ чъыгхэмрэ куандэхэмрэ якъутамэхэр джыдэдэм агуаупкIых.
Адыгэ электрическэ сетьхэм Краснодар краимрэ Адыгэ Республикэмрэ ямуниципальнэ образовании 8-у нэбгырэ мин 550-рэ фэдиз зыщыпсэухэрэм электроэнергиер аIэкIагъахьэ. Предприятием километрэ мини 9-м ехъу зикIыхьэгъэ линиехэм яфэIо-фашIэхэр егъэцакIэх.