Лъэустэнхьаблэ илъэсым ыкIэ нэс спорт псэуалъэ къыдэуцощт. Ар зышIыщтымкIэ зэпеохэр щыIэгъахэх. ДжырэкIэ чIыгоу фагъэнэфагъэр агъэкъэбзэгъах, къэфэбэжьмэ, IофшIэнхэр аублэнхэм фагъэхьазырыгъ.

ЗэрэрахъухьагъэмкIэ мы мазэу къи­хьагъэм ахэм афежьэщтых. Спорт унэу ашIыщтым метрэ 60 икIыхьэгъэщт, метрэ 25-рэ ишъомбгъогъэщт. «Бизнес-спринт (Спортыр къыхэтэхы)» зыфиIорэ къэралыгъо проектым псэуалъэм ишIын къыдыхэлъытагъ. Урысыем щыпсэухэрэр спортым жъугъэу фэщэгъэнхэр ащ ипшъэрылъ. Къэралыгъом хэхъоныгъэ ышIынымкIэ стартегическэ гукъэкI 42-у щыIэмэ ар ащыщ.

КIыкI Аскэр — Лъэустэнхьэблэ къэ­лэ псэупIэм итхьамат:
— Спорт псэуалъэм ишIын сомэ миллиони 144-р пэIухьащт. Лъакъом ишIынрэ къыпэIулъ чIыналъэм изэтегъэпсыхьанрэ республикэм, районым ыкIи къэлэ псэупIэм яахъщэ зэхэлъкIэ тшIыщт. Лъакъом­кIэ проектыр джырэкIэ агъэхьазыры. Ащ игъэчъын фэгъэзэгъэщтымкIи зэпео тшIыщт. Спорт псэуалъэр къуаджэм ищыкIэгъэ дэд. КIэлэцIыкIухэр бэнэкIэ лъэпкъхэм защыпылъынхэ чIыпIэ тиIэп. Спортзал чылэм дэтэп. Джырэ уахътэм нэс хэкIыпIэу яIагъэр гурыт еджапIэм испортзал, ащ ифутбол шъоф, шъхьаем, ари афикъужьырэп, сыда пIомэ чэзыуи­тIоу еджэнхэр щэкIох. Ащ фэшъхьафэу, нэмыкI программэу «Iэрыфэгъу къэлэ щыIакIэр гъэпсыгъэныр» зыфиIорэм къы­дыхэлъытагъэу футбол цIыкIум пае ешIапIэ тшIыщт, спорт псэуалъэхэр дгъэу­цущтых.

Мыхэм адакIоу нэмыкI зигъо Iофыгъо­хэм ядэгъэзыжьыни Лъэустэнхьаблэ щыдэлажьэх. ЦIыфхэм Iэрыфэгъу псэукIэ яIэным IофшIэнхэр фытегъэпсыхьагъэх. ГумэкIыгъуабэ къызпыкIырэмэ ащыщ псыр. Анахьэу ар зэхэзышIэхэрэр къуа­джэу Тыгъургъой дэсхэр ары. Ащ изэшIохынкIэ къоджэ псэупIэр «Инициативное бюджетирование» зыфиIорэ программэм хэлажьэ. Метрэ 2353-рэ зи­кIы­хьэгъэ псырыкIуапIэхэр мыгъэ ащ щызэблахъущтых.
— «Инициативное бюджетирование» зыфиIорэмкIэ псырыкIуапIэхэр зэкIэ къуаджэм щызэблэтхъу тшIоигъоу. Ахэм илъэс 50 аныбжь. Псыр хъуаоу къарыкIошъурэп. Къэралыгъом къытфитIупщын ылъэкIыщтыр анахьыбэмэ сомэ миллионитIу. ЦIыфхэм ахъщэу къатыщтым пчъагъэр елъытыгъэщт. Ау къоджэдэсхэр фэхьазырых программэм хэлэжьэнхэм, сыда пIомэ, псыр ягумэкIыгъошху, ар шъхьаIэ. ТыгъургъойкIэ псыугъоипIэм игъэпсынкIэ «Псы къабз» зыфиIорэ программэм тыхэлажьэ тшIоигъоу ащ ипроект тшIыгъагъэ, ау тыхэфагъэп. Джы къэкIорэ илъэсым ар дгъэуцушъунэу зыхъукIэ, зэрэпыдгъэнэшъунэу псырыкIуапIэхэр дгъэкIэжьыщтых, — еIо Лъэ­устэнхьэблэ къэлэ псэупIэм ипащэу КIыкI Аскэр.
Лъэустэнхьаблэ игумэкIыгъошхомэ ащыщ урамэу Лениным ыцIэ зыхьырэр.
ПсыичъыпIэхэр зэрэщымыгъэпсыгъэ­хэм къыхэкIэу ощх ужым орыжъылъэ мэхъу, унэхэм, общественнэ чIыпIэхэм, щапIэхэм псыр акIахьэ. Мы гумэкIыгъом идэгъэзыжьынкIэ псэупIэм дэсхэр зэхэгущыIэжьыгъэх ыкIи «Инициативное бюджетирование» зыфиIорэ программэм мыгъэрэ хэлэжьэгъумкIэ ар агъэцэкIэ­жьынэу зэдаштагъ.
Программэ зэфэшъхьафхэм псэупIэр зэрахэлажьэрэр апэрэп. Ахэм яшIуагъэкIэ аужырэ илъэс зэкIэлъыкIохэм бэ ща­шIагъ. БлэкIыгъэ илъэсым «Псы къабз» зыфиIорэ къэралыгъо программэм къыды­хэлъытагъэу псы убытыпIакIэ Лъэустэнхьаблэ щагъэуцугъ, зыгъэпсэфыпIэ чIыпIэхэр, кIэлэцIыкIу джэгупIэхэр ща­шIыгъэх. УщыпсэункIэ щынагъоу щыт унэхэм нэбгырэ 47-рэ къачIащыгъ, унэгъо Iужъухэм аратыгъэ чIыгу Iахьхэм псыр афыращэлIагъ.
Анцокъо Ирин.
Сурэтхэр авторым иех.