«ЩыIэныгъэм пае инфраструктурэр» зыфиIорэ лъэпкъ проектыкIэм къыхиубытэу Мыекъуапэ Лениным игупчэу дэтым игъэ­кIэжьын лъагъэкIуатэ. ПшъэдэкIыжь гъэ­нэфагъэ зиIэ обществэу «Бак-строй» зыфиIорэм Мыекъопэ администрацием ди­шIыгъэ зэзэгъыныгъэм диштэу къэлэ гупчэ шъхьаIэм изытет зэрэпсаоу зэблахъущт.

Осэу къесыгъэм емылъытыгъэу, Лениным и Гупчэ ит фонтаным монтаж IофшIэнхэр щылъэкIуатэх. Остыгъэхэр ащ джы хэтыщтых, Iоф ышIэ зэхъукIэ, музыкальнэ мэкъэмэ зэфэшъхьафхэр кIэлъыщтых. Фонтаным илъачIэ агъэчъыгъахэу, псырыкIуапIэхэр фашIых.
Джащ фэдэу Лениным и Гупчэ плиткакIэкIэ агъэпкIэ­жьыщт, тетIысхьапIэхэр кIэу тырагъэуцощтых, хъэре­нэхэр ыкIи арт-псэуалъэхэр щагъэпсыщтых. АР-м псэолъэшIынымкIэ и Министерствэ къызэритырэмкIэ, Лениным и Гупчэ игъэкIэжьын зэкIэмкIи сомэ миллион 426-рэ пэIуагъэхьанэу къыфатIупщыгъ. Зэзэгъы­ныгъэу зэдашIыгъэмкIэ, 2025-рэ илъэсым ичъэпыогъу мазэ гупчэм щыкIорэ IофшIэнхэр аухынхэу щыт.
2025-рэ илъэсым Адыгеим ипсэупIэ зэфэшъхьафхэм зэкIэмкIи общественнэ чIыпIэ 23-рэ ащагъэкIэжьынэу щыт. ЦIыфхэм ящыIэкIэ-псэукIэ ащ нахь зэтыр­игъэуцощт. Лъэпкъ проектыкIэм ары пшъэрылъ шъхьаIэу иIэр.