Адыгэ Республикэм икъэралыгъо ансамблэ цIэрыIохэу «Налмэсымрэ» «Ислъамыемрэ» блэкIыгъэ шэмбэтым къызэдатыгъэ концертыр къэгъэлъэгъон хьалэмэтэу хъугъэ.

Гъэтхапэм и 1-м ахэм зэдагъэуцугъэ проектым иящэнэрэ пычыгъоу «Уахътэр къэсыгъ» зыфиIорэр Мыекъуапэ къыщатыгъ. Зы илъэсым къыкIоцI къызэдекIоу пычыгъуищ зэхагъэуцуагъ. Адыгэ лъэпкъ орэдымрэ къашъомрэ зы программэм зэдыхэтхэу къагъэлъэгъуагъ. Ар ямышIыкIэу агъэпсыгъ, еплъыхэрэм лъэшэу ашIогъэшIэгъоныгъ.
Къашъомрэ орэдымрэ адыгэ лъэпкъым игъашIэ, ипсэукIэ изы Iахьых. Лъэпкъым шIоу ылэжьырэр зэкIэ зэрахьылIэгъэ къэгъэлъэгъоныр ансамблитIум зэкIужьэу агъэпсыгъ.
Лъэпкъым къыхэкIыгъэ ижъырэ къа­шъохэу «Щырыщ зэфакIу», «Къэшъо­къуанч» зыфиIохэрэм щыIэкIакIэ агъотыжьыгъ. Непэрэ лъэхъаным диштэрэ хореографическэ композициеу «Налмэ­сыр къэшъо» зыфиIорэр ыкIи нэмыкIхэр гъэшIэгъон дэдэу агъэпсыгъэх.

Зэдырагъаштэзэ къашъор къашIыныр сценэм ишапхъэхэм адиштэрэ шIыкI, ау ащ итарихъ зыфэдэр, лъэпкъым ритыщтыгъэ мэхьанэр къэшъокIо купым ипрограммэ хэбгъэхьаныр ыкIи къэбгъэ­лъэгъоныр IэшIэхэп. Ансамблэу «Налмэ­сым» ар фызэшIокIыгъ.
— Адыгэ къэшъожъхэр шъошакIэм илъхэу къэтшIыгъэх. ЛъэныкъуакIэхэм яхьатыркIэ ахэм непэ ятIонэрэ щыIэныгъэ агъотыжьыгъ. Ау сыдми къэугупшысыгъэу щымытэу 1937-рэ илъэсым тырахыгъэгъэ къашъор къызэрашIыгъэм фэдэу дгъэуцугъэ. Уахътэр къэси «Налмэсымрэ» «Ислъамыемрэ» проектышхо зэдэдгъэцэкIагъ. Лъэпкъ искусствэр хэгъэгум нахьышIоу щашIэным фэшI тапэкIи концертхэр зэхэтщэщтых. Урысыем щыпсэурэ лъэпкъ цIыкIухэм якультурнэ кIэн къызэте­гъэнэжьыгъэным фэлэжьэрэ проектыкIэхэм тапэкIи тахэлэжьэщт. Лъэпкъ шэн-хабзэхэм зягъэужьыжьыгъэным, пIуныгъэ тэрэз ныбжьыкIэхэм ягъэгъо­тыгъэным тыдэлэжьэщт, — къыIуагъ «Налмэсым» ихудожественнэ пащэу, УФ-м, Пшызэ шъолъырым, Абхъаз Республикэм язаслуженнэ, АР-м инароднэ артистэу Хъоджэе Аслъан.
«Ислъамыер» адыгэ орэдым ыкIи къашъом абзэ куоу зэхэзышIэу, искусствэ ин зезыхьэрэ ансамблэшху.
— ТилъэпкъкIэ адыгэ къашъом ыкIи орэдым мэхьанэшхо яI, ар тикультурэ игушъхьэлэжь баиныгъэ изы IахьышIу, адыгэм ыгу къигущыIыкIырэ шэн-хабз. Проектым ипшъэрылъхэр купитIуми дгъэцэкIагъэу сэлъытэ. ЦIыфхэр къа­шъомрэ орэдымрэкIэ зэфэтщэнхэм тапэкIи тыпылъыщт. Лъапсэр — ижъырэ лъэпкъ мэкъамэр ары, ащи игъэкIотыгъэу тыдэлажьэ. Ижъырэ орэдхэм, мэкъамэхэм ямызакъоу, адыгэ къашъохэми Iоф адэтэшIэ, лъэпкъым ишэн-хабзэхэр къэтэухъумэ, — къы­Iуагъ «Ислъамыем» ихудожественнэ пащэу, АР-м искусствэхэмкIэ изаслуженнэ IофышIэшхоу Нэхэе Азэмат.
ЦIыфхэм нахь якIэсэ «Ныдэлъф мэкъамэхэр», «Нартмэ ярапсодие», «Айдэмыркъан иорэд», «КъокIас», «Сэр­маф» зыфиIохэрэр «Ислъамыем» хэтхэм къаIуагъ.
Адыгэ мэкъамэр къэзытырэ Iэмэ-псымэр имыгъусэу лъэпкъ къашъомрэ мэкъамэмрэ къэшIыгъуай. КупитIуми яоркестрэхэр блэкIыгъэ уахътэм инепэрэ ыкIи инеущрэ мафэхэр мэкъамэхэмкIэ нэгум къыкIагъэуцо. «Налмэсымрэ» «Ислъамыемрэ» япроектэу «Уахътэр къэсыгъ» зыфиIорэр шэпхъэшIухэм адиштэу зэдагъэцэкIагъ.
Сурэтхэр авторым иех.