Адыгэ Республикэм исимфоническэ оркестрэ концертэу «Мендельсон и Григ» зыфиIорэр къытыгъ. Дунаим щызэлъашIэрэ Феликс Мендельсонрэ Эдвард Григрэ атхыгъэ мэкъамэхэр ащ щыIугъ. Къэгъэлъэгъоным цIыфыбэ еплъыгъ ыкIи агу рихьыгъ.

— Мендельсонрэ Григрэ цIыф зэфыщытыкIэ лъагэм инэшанэхэр мэкъамэмкIэ къыраIотыкIы. Лъэпкъ пэпчъ ишэн-хабзэхэр дахэх. ЧIыпIэр къэзыгъэдахэрэр цIыфыр ары. Анахьэу хэзгъэунэфыкIы сшIоигъу концертым къыхэлэжьэгъэ АР-м иансамблэу «Ислъамыем» иартисткэу, пианисткэу Цэй Бэлэ иIэпэIэсэныгъэ. Сэнаущыгъэ ин зэрэхэлъыр пианисткэм къыгъэшъыпкъэжьыгъ, — къыIуагъ АР-м исимфоническэ оркестрэ ихудожественнэ пащэу ыкIи идирижер шъхьаIэу СтIашъу Къэплъан.
Концертнэ программэр едзыгъуитIоу зэтеутыгъ. Апэрэм IэпэIэсэныгъэшхо зыхэлъ пианисткэу Цэй Бэлэ симфоническэ оркестрэм сценэм къыдытехьагъ. Фортепианэмрэ оркестрэмрэ апае ком­позиторитIум атхыгъэр къыригъэIуагъ.
ЯтIонэрэ отделением Мендельсон иящэнэрэ симфониеу «Шотландская» зыфиIорэр щыIугъ. Ижъырэ Шотландием ифэмэ-бжьымэхэр зыпхырыщыгъэ мэкъамэхэр симфоническэ оркестрэм къыригъэIуагъ.
Симфоническэ оркестрэм Iоф зи­шIэ­рэм щыублагъэу мэкъэмэ шъэ пчъагъэ къыригъэIуагъ. Къэгъэлъэгъон пэпчъ кIэ горэ хэт. Хэгъэгу ыкIи лъэпкъ искусствэр къызэтегъэнэгъэнхэр, тапэкIэ хэхъоныгъэ ягъэшIыгъэныр, цIыфхэр академическэ искусствэм фэщэгъэнхэр, зэлъа­шIэгъэ композиторхэм аусыгъэ произведениехэм нэIуасэ афэшIыгъэнхэм оркестрэм ипшъэрылъ ыкIи ар дэгъоу егъэцакIэ.

Сурэтхэр оркестрэм ихъарзынэщ.