ГандболымкIэ Урысыем и Суперлигэ хэт «АГУ-Адыифым» мы мафэхэм тарихъ мэхьанэ зиIэ текIоныгъэ къыдихыгъ.

Адыгэ къэралыгъо университетым и Ордэунэу Кобл Якъубэ ыцIэ зыхьырэм щызэIукIагъэх Адыгеим икомандэрэ Звенигород къэзыгъэлъэгъорэ «Звездамрэ».
«АГУ-Адыиф» — «Звезда» — 33:31 (15:17)
Мыекъуапэ ипшъашъэхэм гъэ­хъэгъэшхо ашIыгъ. Илъэс 20 хъугъэу мы командэхэр чемпионатым щызэIокIэх, ау Адыгеим илIыкIохэмкIэ мыр апэрэ текIоныгъ. ТIогъогогъо пчъагъэр зэфэдизэу аухыгъ: 2005-рэ илъэсым тыгъэгъазэм и 26–м — 34:34, 2008-рэ илъэсым Iоныгъом и 27-м — 25:25. 2024-рэ илъэсым шэкIогъум яIэгъэ зэIукIэгъум тигандболисткэхэр текIоныгъэр къы­да­хыным пэблэгъагъэх, ау пчъа­гъэр 24:25-у ешIэгъур аухыгъ. Ау мы­зыгъэгум типшъашъэхэр дэгъу дэдэу ешIагъэх ыкIи зэIукIэгъур къахьын алъэкIыгъ.
Пчъагъэр къызэIуихыгъ «АГУ-­Адыифым» щешIэрэ Ангелина Болоба ыкIи ешIэгъум иапэрэ такъикъи 3-м бысымхэр нахь щылъэшыгъэх. Ау ащ ыуж «Звездам» иешIакIэ ригъэхъугъ ыкIи апэрэ таймыр ыхьыгъ, пчъагъэр — 15:17.
ЯтIонэрэ едзыгъори хьакIэхэм лъэшэу рагъэжьагъ. Такъикъи 4-м къыкIоцI тикъэлапчъэ Iэгоо заулэ къыдадзагъ. Ау такъикъ 15 тешIагъэу Мыекъуапэ игандболисткэхэм пчъагъэр зэфэдиз ашIынымкIэ зы Iэгуау ныIэп дадзэнэу къафэнэгъагъэр. ЗэIукIэгъур аухынкIэ такъикъи 4 къэнагъэу типшъашъэхэр ыпэ ишъыгъэх, пчъагъэр — 30:29. Зы такъикъ къэнагъэу зэIукIэгъум иешIэкIо анахь дэгъоу Юлия Хавронинам тазырыр дэгъоу ыгъэцэкIагъ. «Звездам» хэт София Пензевам тикъэлапчъэ Iэгуаор къыдидзагъ. Ау аужырэ Iэгуаор къэлапчъэм дэзыдзагъэр «АГУ-Адыифым» щешIэрэ Виктория Коваленкэр ары. Мы уахътэм цыхьэшIэгъоу ешIагъ тикъэлэпчъэIутэу Тамара Гобадзе. Пчъагъэр 33:31-у зэIукIэгъур аухыгъ. Командэм икапитанэу Кобл Зуретэ къызщыхъугъэ мафэм типшъашъэхэм текIоныгъэр къыдахыгъ, ащ дакIоу мы спорт лъэпкъыр зыгу рихьыхэу тиреспубликэ щыпсэухэрэр агъэ­гушIуагъэх.

— ЗэIукIэгъур зэрэкIощтым, тызэрешIэн фаем бэрэ татегущыIагъ, тягупшысагъ. Ухъумэныр дэгъоу къыддэхъугъ, текIоныгъэр къыдэтхыгъ. Арышъ, мыщ фэдэу тыджэгун тлъэкIыщт. Тыщэгугъы тапэкIи тиешIакIэ едгъэхъунэу, къытэплъырэ ыкIи къытфэгумэкIырэ цIыфхэр дгъэгушIонхэу, — къыIуагъ «АГУ-Адыифым» хэт Юлия Хавронинам.
«АГУ-Адыифым» хэтыгъэх: къэлэпчъэIутхэр — Баскаковар, Гобадзе, Пивневар. Хавронинар — 12, Къэбжьыр — 4, Коваленкэр — 4, Коблыр — 2, Кавера — 2, Локян — 2, Болоба — 2, Бондаренкэр — 1, Зарецкаяр — 1, Сергиенкэр — 1, Алексеевар — 1, Смирновар — 1.
«Звездам» щешIагъэх: къэлэпчъэIутхэр — Долгих, Лебедевар. Вертушковар — 9, Герасимовар — 6, Кандаковар — 4, Коркинар — 4, Пензевар — 3, Триобчук — 3, Авдошко — 1, Миленинар — 1, Обуховскаяр.
Командэхэр зыдэщыт чIыпIэхэр ыкIи очко пчъагъэу рагъэкъугъэр:

1. «Динамо-Синара» — 23.
2. «Звезда» — 20.
3. «Луч» — 15.
4. «АГУ-Адыиф» — 8.
5. «Университет» — 0.
   КъыкIэлъыкIощт зэIукIэгъур «АГУ-Адыифым» Звенигород щыриIэщт, гъэтхапэм и 13-м джыри зэ «Звездам» дешIэщт.