ТхэквондомкIэ дунаим ипервенствэу Абу-Даби щыкIощтым Урысыер къыщигъэлъэгъощт Мыекъуапэ щы­псэурэ Бырдж Хадидже.

Олимпийскэ тхэквондомкIэ Урысыем ипервенствэ къалэу Люберцы щыкIуагъ. Къэралыгъом ишъолъыр 60-мэ къарыкIыгъэ спортсмен 788-мэ заушэтыгъ, аныбжьыр илъэс 12-м щегъэжьагъэу 14-м нэс.
Адыгэ Республикэр къэзыгъэлъэгъуагъэхэр олимпийскэ резервым испорт еджапIэу N 2-м зыщызыгъэсэрэ нэбгырищ. Ау гъэхъагъэ зышIын зылъэкIыгъэ закъор Бырдж Хадидже. Пшъашъэм зэIукIэгъуитф иIагъ, зэкIэри къыхьыгъэх ыкIи къытефэу дышъэ медалыр къыфагъэшъошагъ. Мы текIоныгъэм ишIуагъэкIэ тиспортсменкэ Урысыем ихэшыпыкIыгъэ командэ хэхьагъ ыкIи жъоныгъуакIэм АбуДаби щыкIощт дунаим ипервенствэ хэлэжьэнэу фитыныгъэ къыдихыгъ. Ащ итренерых Олег Тыщенкэмрэ Александр Охрименкэмрэ.