Адыгэ Республикэм ­ибзылъфыгъэхэм я Союз ия X-рэ зэфэхьысыжь-хэдзын конференцие АР-м и ЛIышъхьэу КъумпIыл Мурат хэлэ­жьагъ.

АР-м IофшIэнымрэ со­циальнэ хэхъоныгъэмрэкIэ иминистрэу Мырзэ Джанбэч, шъолъырым имуниципальнэ образованиехэм ялIыкIохэу Союзым хэтхэр Iофтхьабзэм къырагъэблэгъагъэх.
Унагъом иджэныкъо бзылъфыгъэхэм къызэраухъумэрэм имызакъоу, Адыгеим со­циальнэ-экономикэ хэхъоныгъэхэр ышIынхэм яIахьышIу зэрэхэлъыр, культурнэ ыкIи общественнэ-политическэ щыIакIэм чанэу зэрэхэла­жьэхэрэр АР-м и ЛIышъхьэ ипэублэ гущыIэ къыщыхи­гъэщыгъ.
— УФ-м и Президентэу Владимир Путиным зэриIоу, «щыIэныгъэмкIэ анахь мэхьанэ зиIэ лъэныкъохэм — псауныгъэм икъэухъумэн, гъэсэныгъэм, шIэны­гъэм, культурэм, предприни­ма­тельствэм, къэралыгъо ыкIи муниципальнэ гъэIоры­шIапIэхэм бзылъфыгъэхэр ащымылажьэхэу уегупшысэн плъэкIырэп, — къыIуагъ КъумпIыл Мурат.
КъыткIэхъухьэрэ лIэужхэм ягъэсэныгъэ-пIуныгъэ Адыгеим ибзылъфыгъэхэм яIахьышIу сыдигъуи зэрэхэлъыр шъолъырым ипащэ къыхигъэщыгъ.
Бзылъфыгъэхэм я Союз иIофшIэн къытегущыIэзэ, ащ общественнэ мэхьанэшхо зэриIэр, республи­кэм ис бзылъфыгъэ анахь чанхэр, сэнаущыгъэ ин зы­хэлъхэр зэрэзэрипхыхэрэр АР-м и ЛIышъхьэ къыIуагъ.

— АР-м ибзылъфыгъэхэм я Союз мэхьанэшхо зиIэ Iо­фыгъохэм язэшIохынкIэ Iэпы­Iэгъушхо къытфэхъу. Адыгеим ищыIэныгъэ чанэу хэлажьэх. Ныхэм, сабыйхэм IэпыIэгъу ягъэгъотыгъэным, кIэлэцIыкIухэм ягъэсэн, япIун, ныбжьыкIэхэм ягушъхьэ­баиныгъэ хэгъэхъогъэным, унагъом имэхьанэ къэIэтыгъэным афэгъэхьыгъэу бэ зэхащэрэр. ГъэрекIо — унагъом и Илъэс — бэ зэшIохыгъэ хъугъэр, — къыIуагъ КъумпIыл Мурат.
ХэушъхьафыкIыгъэ дзэ операцием хэлажьэхэрэм, ахэм яунагъохэм IэпыIэгъу афэхъугъэнымкIэ IофшIэнэу зэшIуахырэм шъхьафэу республикэм и ЛIышъхьэ къытегущыIагъ. ШIушIэ IэпыIэгъур зэраугъоирэм имызакъоу, дзэкIолIхэм апае хъытыухэр ашIых, Iофтхьэбзэ зэ­фэшъхьафхэр зэхащэх. Ветеран­хэм IофшIэпIэ чIыпIэ ягъэгъотыгъэнымкIэ IэпыIэгъу афэхъух, яунагъохэм яшIуагъэ арагъэкIы. АщкIэ зэрафэразэр КъумпIыл Мурат къариIуагъ.
Iофтхьабзэм къыдыхэлъы­тагъэу Адыгэ Республикэм ибзылъ­фыгъэхэм я Союз хэтхэм ащыщхэр агъэшIуагъэх. Ольга Пронтенкэм, Ирина Сергеевам, ЛIышэ Хъарет, Хьаджэбыекъо Фатимэ, Надежда Шевченкэм АР-м и ЛIышъхьэ и Щытхъу тхылъ аратыгъ.
Нэужым бзылъфыгъэхэм я Союз ипащэу Вэрэкъо Хьалимэт илъэситфым къыкIоцI Iофэу ашIагъэм къытегущыIагъ. Ащ къызэриIуагъэмкIэ, мы уахътэм къыкIоцI Союзым хэтхэм япчъа­гъэ фэдитфыкIэ хэхъуагъ, бзылъфыгъэ 1448-рэ ахэр мэхъух. ДжырэкIэ районхэм ­къутэми 9 ащыI, зы комитет, клуб 11 ыкIи бзылъфыгъэ совет 24-рэ мыщ хэхьэ. Координационнэ совет, министерствэ ыкIи къулыкъу зэфэшъхьафхэм яэкспертнэ комиссие 17-мэ ахэтых.
Республикэм ихэбзэ къулыкъу 25-мэ зэзэгъыныгъэ адашIы­гъэу Iофтхьэбзэ зэфэшъхьафхэр зэ­хащэх. Грант IэпыIэгъум ишIуа­гъэкIэ социальнэ мэхьанэ зиIэ проекти 3 щыIэныгъэм щы­пхыращыгъ. Унагъом имэхьанэ къэIэтыгъэным, бзылъфыгъэм исо­циальнэ рэхьатныгъэ, шэн-­хабзэхэм якъэухъумэн ахэр афэ­гъэхьыгъэх. Унагъом къин щызылъэгъурэ бзылъфыгъэхэм ягумэкIыгъохэм, кIэлэцIыкIухэм япIун, ягъэсэн, унагъом, адыга­бзэм ямэхьанэ зегъэушъомб­гъугъэным ыкIи нэмыкIхэм япхы­гъэ Iофтхьабзэхэр бэу зэхащагъэх. Семинархэр, форумхэр, адыгэ шхынхэм, шэн-хабзэхэм афэгъэхьыгъэ къэгъэлъэгъонхэр зэхащагъэх. Джащ фэдэу къоджэ псэупIэхэм ащыпсэурэ уна­гъохэм ящыIэкIэ-псэукIэ на­хьы­шIу шIыгъэнми анаIэ зэрэтетыр Вэрэкъо Хьалимэт къыхигъэ­щыгъ.
ХэушъхьафыкIыгъэ дзэ операцием хэлажьэхэрэм, ахэм яунагъохэм IэпыIэгъу ягъэгъотыгъэнымкIэ IофшIэнэу ашIэрэм нэужым ар къытегущыIагъ. Хэбзэ къулыкъухэр, Фондэу «Хэгъэгум иухъумакIохэр» зыфиIорэр, дзэ частьхэр яIэпыIэгъухэу Iофтхьабзэхэр зэхащагъэх, яIэпыIэгъу алъагъэIэсыгъ.
Конференцием къыдыхэлъытагъэу докладхэр къашIыгъэх, нэужым хэдзынхэр рагъэкIокIыгъэх, зэкIэми зэдырагъаштэу Вэрэкъо Хьалимэт бзылъфыгъэхэм я Союз итхьаматэу хадзыжьыгъ.
ДЕЛЭКЪО Анет.