Адыгэ Республикэм щы­зэлъашIэрэ теннисистэу Анатолий Чапуриным испорт щыIакIэ джыри зы гушIуагъо къыфи­хьыгъ. Илъэс 75-рэ зыныбжь спортсменыр шъолъырхэм яветеранхэм азыфагу щыкIогъэ зэнэкъокъоу «Смоленская крепость» зыцIэм къыщыхагъэщыгъ.

Хэгъэгум ишъолъыр 37-мэ яспортсмен 250-рэ къалэу Смоленскэ щызэIукIагъ. Беларусым къикIыгъэхэри щыIагъэх, арышъ, дунэе мэхьанэ Iофтхьабзэм иIагъэу пIон плъэкIыщт.
Аныбжь елъытыгъэу купи 7-у ахэр гощыгъагъэх. Анатолий Степан ыкъор Адыгеим ыцIэкIэ зэнэкъокъум хэлэжьагъ, илъэс 75-м къехъухэрэр зыхэхьэрэ купэу нэбгырэ 15 хъущтыгъэм ар хэтыгъ ыкIи зэIукIэгъоу иIагъэхэр теубытагъэ хэлъэу къыхьыхэзэ, финалым нэсыгъ. КIэух зэIукIэгъоу Тулэ щыщ спортсменэу Александр Калошиным дыриIагъэм ар щытекIон ылъэкIыгъэп, ау тыжьы-
ныр къыхьыгъ.