Гъогухэр щынэгъончъэнхэм пае
Адыгэ Республикэм лъэшэу анаIэ щытырагъэты гъогухэм ягъэкIэжьын иIоф. Нафэу зэрэщытымкIэ, лъэпкъ проектэу «ЩыIэныгъэм пае инфраструктурэр» зыфиIорэр пхырыщыгъэным тегъэпсыхьагъэу мы илъэсым IофшIэн гъэнэфагъэ гъогухэм ащагъэцэкIэщт.
Пшъэрылъ шъхьаIэхэу мы лъэпкъ проектым къыдилъытэхэрэм ащыщ транспорт инфраструктурэр щынэгъончъэныр. Гъогухэм ящынэгъончъэн нахь зыкъегъэIэтыгъэнымкIэ Адыгеим IофшIэн гъэнэфагъэ щагъэцакIэ. ГущыIэм пае, илъэсэу икIыгъэм гъогухэм япхыгъэ лъэпкъ проектым къыдыхэлъытагъэу республикэм игъогухэм къатехъухьэрэ хъугъэ-шIагъэхэр зыгъэунэфын зылъэкIыщт пкъыгъо 16 атырагъэуцуагъ. Ахэм гъогухэм къатехъухьэрэ хъугъэ-шIагъэхэр, шэпхъэ укъоныгъэхэр зэкIэ къагъэлъэгъощтых: скоростым къезыгъэхъухэрэр, лъэныкъоу транспортыр зэрыкIон фаер зыукъохэрэр, нэфрыгъуазэм тетэу мызекIохэрэр, тамыгъэхэр къыдэзымылъытэхэрэр, имыпхагъэу машинэхэм арысхэр.
ГухэкI нахь мышIэми, мы аужырэ илъэсым гъогухэм къатехъухьэрэ тхьамыкIагъохэм япчъагъэ нахьыбэ хъугъэ. Гъогухэм ящынэгъончъэнкIэ Комиссиеу республикэм щызэхэщагъэм изэхэсыгъо Адыгеим и ЛIышъхьэу КъумпIыл Мурат къулыкъу гъэнэфагъэхэм пшъэрылъ щафишIыгъагъ анахь гумэкIыгъо къызыпыкIырэ гъогу Iахьхэр агъэунэфынхэу, Iофтхьэбзэ гъэнэфагъэхэри зэрахьанхэу. Республикэм и ЛIышъхьэ джащ фэдэу къыIуагъ шэпхъэ укъоныгъэхэр къэзыгъэлъэгъорэ пкъыгъохэу гъогухэм атырагъэуцохэрэр, нэфрыгъуазэхэр ыкIи макъэ къэзыгъэIурэ пкъэу цIыкIухэр нахьыбэ шIыгъэнхэ зэрэфаер.
Адыгеим гъогурыкIоныр щынэгъончъэнымкIэ Гупчэу Iоф зышIэрэм къызэрэщыхагъэщыгъэмкIэ, 2025-рэ илъэсым транспорт инфраструктурэм ищынэгъончъэнкIэ IофшIэнэу агъэцакIэрэр лъагъэкIотэщт. Мы илъэсым лъэпкъ проектэу «ЩыIэныгъэм пае инфраструктурэр» зыфиIорэм къыдыхэлъытагъэу Адыгеим шапхъэхэр зыукъохэрэр къэзыгъэлъэгъощт пкъыгъо 16 атырагъэуцощт, муниципальнэ мэхьанэ зиIэ гъогухэм ащ фэдэу 11, шъолъыр автомобиль гъогухэм – 3, федеральнэ мэхьанэ зиIэ гъогухэм – 2 атет хъущт. Сомэ миллион 48-рэ ахэм апэIухьанэу къыхагъэкIыгъ.
Къулыкъум къызэрэщаIуагъэмкIэ, гъогурыкIонымкIэ шапхъэхэр мыукъогъэнхэм къикIырэр цIыфхэу транспортыр зыгъэIорышIэхэрэр ыкIи нэмыкIхэу зэрар зыхьын зылъэкIыщтхэр щынэгъончъэу псэунхэр ары.
Адыгеим игъогухэм ящынэгъончъэнкIэ Iофтхьабзэу зэрахьэхэрэм афэгъэхьыгъэ къэбарыкIэхэр АР-м гъогурыкIоным ищынэгъончъэнкIэ и Гупчэ исоциальнэ хъытыухэм арыжъугъотэщт: (https://t.me/cbdd_ra).