Къалэу Шъачэ ыкIи ТIопсэ районым ащыпсэухэрэмкIэ хабзэ хъугъэ хэушъхьафыкIыгъэ дзэ операцием хэлажьэхэрэм шIушIэ IэпыIэгъу афаугъоиныр ыкIи афащэныр.

Поселкэу Шэхапэ и ТОС исовет итхьаматэу Олег Аншуковым къызэриIорэмкIэ, шIушIэ IэпыIэгъум епхыгъэ IофшIэныр псынкIэу къаIэкIэхьагъэп. ЗымышIэхэрэмкIэ, ежь-ежьырэу зэкIэ зэпыфэрэм фэд, мэкъэгъэIу бгъэIумэ икъущтэу, ащ лъыпытэу щыгъынхэри гъомылапхъэхэри къаугъоинхэшъ, ахэр машинэкIэ птIупщынхэ къодыеу къашIошIы. Iофыр зетэгъажьэр ары тэри тызщыгъозагъэр ащ хэушъхьафыкIыгъэу укъекIолIэнэу зэрэщытыр. Хэмыукъорэр зи зымышIэрэр ары, тыхэукъоуи хъугъэ, ау лъэбэкъу-лъэ­бэкъоу ыпэкIэ тылъыкIотагъ, фронтым ищыкIэгъэ IэпыIэгъум иугъоин хэзыгъэ тымышIэу, зыч-зыпчэгъоу, зэкIэхэри къыхэдгъэлажьэхэу тыублагъэ — хэбзэ къулыкъухэр, депутатхэр, организациехэр, сатыушIхэр, къалэм ыкIи районым ащыпсэухэрэр.
— ИлъэситIукIэ узэкIэIэбэжьмэ, анахь макIэмкIэ едгъэжьэгъагъ — тикъоджэгъухэу хэушъхьафыкIыгъэ дзэ операцием хэлажьэхэрэм апае IэпыIэгъур шъхьаф-шъхьафэу тыугъоищтыгъ, — къеIуатэ общественникым. — БлэкIыгъэ илъэсым изэфэхьысыжьхэмкIэ, Шэхапэ чIыпIэ зыгъэIорышIэжьынымкIэ икъулыкъу ПсышIопэ районымкIэ анахь дэгъоу лэжьагъэу къыхагъэщыгъ, ащ ипащэ медалэу «Хэгъэгум къулыкъу зэрэфихьырэм фэшI» зыфиIорэр къыфагъэшъошагъ, ар гуфэкIо чанхэр ары зэратырэр. Апэ зетэгъа­жьэм, тэ шъхьафэу тыугъуаещтыгъэмэ, нэужым шIушIэ IэпыIэгъум фэгъэхьыгъэ Iофтхьабзэу къалэм зэхищэхэрэм тахэлажьэ хъугъэ.

ДжырэкIэ Шэхапэ щыпсэухэрэм, адырэ общественникхэу Шъачэ ирайонхэм ащыщхэм афэдэу, хэушъхьафыкIыгъэ дзэ операцием анахьэу къащышъхьэпэщтхэр ары къаугъоихэрэр. А Iофыр нахьышIоу рагъэкIокIыным фэшI IэпыIэгъум фэгъэзэгъэ пунктыр поселкэм къыщызэIуа­хыгъ. ЧIыпIэр мэкъумэщ хъызмэтшIапIэу «ТекIоныгъэм» къаритыгъ. Чэщи мафи зэпымыоу IофшIэныр лъагъэкIуатэ, ар къыкIегъэтхъы пунктым ипащэу Татьяна Цейтер. Мыщ IэпыIэгъур щызэрагъафэ, автотранспортыр щаушъэ. Общественникхэр IэпыIэгъум ищэн ежь ашъхьэкIэ хэлажьэх, гъунэпкъэ шъолъырхэм анэс адакIох. Iофэу ашIагъэм изэфэхьысыжьхэр, аугъоигъэ-атIупщыгъэхэр поселкэм ичат къыщыхаутых. Аужырэ илъэситIум Шэхапэ щыпсэурэмэ хэушъхьафыкIыгъэ дзэ операцием хэлажьэхэрэм ыкIи шъо­лъырыкIэхэм апае шIушIэ IэпыIэгъоу тонни 100-м ехъу къаугъоигъ, зэкIэмкIи сомэ миллиони 9-рэ мин 500-рэ ащ тырагъэкIодагъ. А IофшIэныр къэуцурэп, лъагъэкIуатэ. Мы мафэхэм Луганскэ Народнэ Республикэм зичэзыу шIушIэ IэпыIэгъур атIупщыгъ.

— ИлъэсыкIэм ехъулIэу IэпыIэгъур Донецкэ Народнэ Республикэм нагъэсыгъ, щылэ мазэм ыгузэгухэм — Белгородскэ ыкIи Луганскэ хэкум апае, — къеIуатэ Татьяна Цейтер. БлэкIыгъэ илъэсым ибэдзэогъу мазэ ащ медалэу «ХэушъхьафыкIыгъэ дзэ операцием хэлажьэ» зыфи­Iорэр къыфагъэ­шъошагъ. — IэпыIэгъум хэхьагъэх псэолъэшI материалхэр, мэфэкIым ехъулIэу IэшIу-IушIу зэфэшъхьафхэр, пхъэшъхьэ-мышъхьэхэр. Iофтхьабзэм къыхэлэжьагъэх хъыз­мэтшIапIэхэу «ТекIоныгъэр», «Градриэлт» зыцIэр, виллэу «Лирань», зыгъэпсэфыпIэу «Шэхапэ» ыкIи чIыпIэрысхэр. ЗэкIэ тызэхэзыхыгъэхэм тафэраз! Тызэгъусэу текIоныгъэм тыфэкIощт!
Шэхапэ, джащ фэдэу ШэхэкIэй ыкIи ШэхэкIэй ЦIыкIум ащыпсэурэ сатыушIхэри, цIыф къызэрыкIохэри мы Iофтхьабзэм чанэу къыхэлажьэх, ахэр лъэпкъ зэфэшъхьафхэм ащыщых. Кобл Аслъан, Дэгуф Руслъан, Хъущт Рэмэзан, Ацумыжъ ГъучIыпс, Къадый Рэмэзан, ЛIыф Хъалид, Кобж Салмэт, АкIэгъу Светлан, Кобж Мэдин, Хъущт Айдэмыр, ЛIыф Ислъам, Кобж Лид, ЛIыф Шарет, Гъуашэ Фатим, Бастэ Айдэмыр ыкIи нэмыкIхэр ренэу тиIэпыIэгъух.
2023-рэ илъэсым игъатхэ къыщыублагъэу зыгъэбылъхэрэ хъытыухэм яхъыни зэхащагъ.
— Хъытыухэм яхъын пэIухьащтыр ТОС-м къытеты, тэ унэу а Iофыр зыщыдгъэцэкIэщтыр дгъэнэфагъэ, — къеIуатэ учреждением ипащэу Людмила Ткаченкэм. — Хъытыу 60-м ехъу хэушъхьафыкIыгъэ дзэ операциер зыщыкIорэ чIыпIэм ядгъэ­щэгъах, а IофшIэныр джыри къэдгъэуцурэп.
ШIушIэ IэпыIэгъум епхыгъэ Iофтхьабзэр зэрэрекIокIырэм ренэу ынаIэ тет ыкIи къыхэлажьэ Шъачэ и Къэлэ ЗэIукIэ идепутатэу Хъущт Заур. «Урысые дзэ­кIолIхэм ялъэшыгъэ, япсэемыблэжьныгъэ бэкIэ тэри къытэлъытыгъ, тызэдеIэхэзэ текIоныгъэр къызэрэдгъэблэгъэщтым щэч хэлъэп, — къыхигъэщыгъ ащ. — ШIушIэ ыкIи гуфэкIо организациехэм зэпхыныгъэ адытиI, цIыфмэ тадэлажьэ, ащ елъытыгъэу IэпыIэгъу дэгъу тыугъоин тэлъэкIы. ТапэкIи тиухъумакIохэм тадеIэзэ тшIыщт».
Джащ фэдэу ПсышIопэ районым ипащэу Максим Ермолаевым къызэрэхи­гъэщыгъэмкIэ, мы IофтхьэбзэшIум общественнэ организации 10-м ехъу ыкIи ныбжь зэфэшъхьаф зиIэ нэбгыришъэ пчъагъэ къыхэлажьэ.
ТIопсэ муниципальнэ шъолъырым ихэбзэ къулыкъухэм, депутатхэм, Адыгэ Хасэм хэтхэм, гуфакIохэм ыкIи цIыф къызэрыкIохэм мы лъэныкъомкIэ ячаныгъэ къагъэлъагъо. Ащ фэдэ щысэу щыIэр бэ. Ныбыгъу къоджэ псэупIэм иадминистрацие къызэрэщаIуагъэмкIэ, шIушIэ IэпыIэгъухэм язырэр сатыушIэу Илья Федоровым игукъэкIыкIэ къаугъоигъагъ. А Iофтхьабзэм хэлэжьэгъагъэх сатыушIэу АкIэгъу Заур, шъолъырым и Совет идепутатхэу Ныбэ Джамбулатрэ Лъэпшъыкъо Илясрэ, Ныбыгъу къоджэ псэупIэм идепутатхэу Шъхьэлэхъо Сэфэррэ Филиппов Аслъанрэ, къоджэ псэупIэм ипащэу Нэгъуцу Вадим. Сомэ мин 730-рэ къаугъоигъагъ, а ахъщэмкIэ къащэфыгъэх бронежилетхэр, каскэхэр, электрогенераторхэр, къазгъырхэр, пхъэх­хэр ыкIи нэмыкIхэр.
Хэгъэгум иухъумакIо и Мафэ ехъулIэу культурэм иIофышIэхэм, ахэм ащыщых ШIоикъорэ КодэшъхьапIэрэ культурэмкIэ яунэхэм ащылажьэхэрэр, тидзэкIолIмэ апае гъомылапхъэхэр, IэшIу-IушIухэр къаугъоигъэх.
— ТидзэкIолIмэ ящыкIэгъэщтхэм тызэдягупшысагъ, нэужым, ахэр мыщ къетхьылIагъэх, — къыщаIотагъ учреждением. — ТэркIэ ар мэхьанэшхо зиIэ Iофыгъу — яунэ къикIы­рэ IэпыIэгъур къазэрафакIорэр тикIалэхэм ашIэныр, ащ щыгугъынхэр.
Ныбэ Анзор.
Сурэтхэр: ТОС-м иех.