Егъэджэнхэм якIэух
Проектэу «Портрет МХК» зыфиIорэр зытегъэпсыхьагъэр дунэе художественнэ IофшIэным итарихъ ухэзыщэрэ шIэныгъэ лекциехэм цIыфхэр нэIуасэ афэшIыгъэнхэр ары.
Я ХХ-рэ лIэшIэгъум иискусствэ фэгъэхьыгъэ проектым къыдыхэлъытэгъэ кIэух лекциер мэзаем и 27-м АР-м и Сурэт къэгъэлъэгъуапIэ щыкIуагъ. Шiэныгъэ-гъэсэныгъэ IофшIэнхэмкIэ методистэу Анастасия Климинар проектым кIэщакIо фэхъугъ. ИскусствоведениемкIэ кандидатэу, Мыекъопэ къэралыгъо технологическэ университетым идоцентэу КIэдыкIое Нэфсэт егъэджэн сыхьатхэр зэхищагъэх.
— БэшIагъэ проектым Iоф дэтшIэнэу тыгу къызихьагъэр. 2022-рэ илъэсым Сурэт къэгъэлъэгъуапIэм Iоф щысшIэнэу зесэгъажьэм къыщыублагъ. Мы псэуалъэр загъэкIэжь нэуж проекторыр, тематическэ музыкэр къызфэдгъэфедэхэзэ, камернэ-шIэныгъэ Iофтхьабзэхэр зэхэтщэнхэу амал тиIэ хъугъэ. ЫпэрапшIэ проектым тызэреджэщтыр къыхэтхыгъ, КъохьэпIэ Европэм иискусствэ илъэхъанэ пэпчъ тыкъытегущыIэнэу итхъухьагъ. IэпэIэсэныгъэшхо зыхэлъ КIэдыкIое Нэфсэт ишIуагъэкIэ тигухэлъ къыддэхъугъ, — къыддэгощагъ проектыр зэхэзыщагъэу, шIэныгъэ-гъэсэныгъэ IофшIэнымкIэ Сурэт къэгъэлъэгъуапIэм иметодистэу Анастасия Климинар.
Проектэу «Портрет МХК» зыфиIорэм АР-м и Сурэт къэгъэлъэгъуапIэ къыгъэхьазырыгъэ лекциехэм къыщяджагъэх. Анахьэу зэхэщакIохэм анаIэ зытырагъэтыгъэр Европэм икультурэ зызэриушъомбгъурэр, ащ ифэмэ-бжьымэ джырэ искусствэм, дизайным, архитектурэм зэратехьэрэр ары.
Iофтхьабзэм къыдыхэлъытагъэу лекции 7 хъурэ егъэджэн сыхьатмэ КIэдыкIое Нэфсэт къяджагъ. Ахэр живописым, архитектурэм, скульптурэм, ижъ дэдэкIэ къыщегъэжьагъэу я ХХ-рэ лIэшIэгъум нэс модэм изытетыгъэ, ахэм адэлэжьэгъэ цIыфхэм яхьылIагъэх.
— Художественнэ искусствэм республикэм зыщегъэушъомбгъугъэным, цIыфхэр нахьыбэу ащ фищэнхэм Сурэт къэгъэлъэгъуапIэр пылъ. Тэ, кIэлэегъаджэхэм, типшъэрылъыр ныбжьыкIэхэм яамалхэм икъоу зыкъызэIуягъэхыгъэнымкIэ ищыкIэгъэ Iофтхьабзэхэр зэхэтщэнхэр ары, — къыIуагъ КIэдыкIое Нэфсэт.
—АР-м и Сурэт къэгъэлъэгъуапIэ щызэхащэрэ Iофтхьабзэхэм сигуапэу сахэлажьэ. Проектэу «Портрет МХК» зыфиIорэм иегъэджэн сыхьати 7-ми сядэIугъ. Анахьэу КъохьэпIэ Европэм иискусствэ илъэхъанэ пэпчъ къызэрэраIотыкIырэ живописыр, скульптурэр, дизайныр зэрэхьалэмэтыр зэхэсшIагъ, — къыIуагъ МКъТУ-м истудентэу Михаил Тяпиным.
Сурэтхэр авторым иех.