Музыкальнэ Iэмэ-псымэхэм къягъэIогъэнымкIэ я ХI-рэ зэIухыгъэ республикэ зэнэкъокъоу ныбжьыкIэхэр зыхэлэжьагъэхэр Адыгеим щыкIуагъ.

Художественнэ гъэсэныгъэм зегъэу­шъомбгъугъэным, хэхъоныгъэхэр ышIынхэм ыкIи искусствэхэмкIэ кIэлэцIыкIу еджапIэхэм ачIэсхэм IэпыIэгъу афэхъу­гъэным апае илъэс къэс зэхащэрэ зэнэкъокъум изэфэхьысыжьхэр къэнэфагъэх. Къэралыгъо программэу «Культурэм ихэхъоныгъ» зыфиIорэм ишIуагъэ­кIэ зэнэкъокъур зэхащагъ.
Адыгэ Республикэм культурэмкIэ и Министерствэрэ республикэм искусствэхэмкIэ икIэлэцIыкIу еджапIэу N 1-м иIофышIэхэмрэ зэхащэгъэ зэнэкъокъум нэбгырэ 27-рэ хэлэжьагъ. Ахэр Адыгеим ыкIи Краснодар краим искусствэхэмкIэ якIэлэцIыкIу еджапIэхэм ащеджэрэ ныбжьыкIэх.
ЕджапIэхэм хэхъоныгъэ ашIыныр, кIэлэеджакIохэм сэнаущыгъэу ахэлъыр къыхэгъэщыгъэныр, ар къагъэшъыпкъэ­жьын алъэкIэу гъэсэгъэнхэр, ныбжьыкIэхэр культурнэ щыIакIэм хэщэгъэнхэр, пшъэрылъ гъэнэфагъэхэр зыфагъэуцужьынхэр, ахэр щыIэныгъэм щыпхыращыжьынхэм фэщэгъэнхэр зэнэкъокъум­кIэ анахь шъхьаIэу щытыгъэх.

Зэнэкъокъум уеплъынкIэ гъэшIэгъоныгъэ. КIэлэеджакIохэм музыкальнэ Iэмэ-псымэхэм къягъэIогъэнымкIэ сэна­ущыгъэу ахэлъыр умыгъэшIэгъон плъэ­кIыщтыгъэп. Мэкъамэхэр икъоу агъэIорышIэхэзэ, ныбжьыкIэхэр шIыкIэшIухэм алъыхъугъэх, искусствэм ыкIуачIэ яп­лъыхэрэм алъагъэIэсыгъ. КIэлэеджакIо­хэм егъэжьэпIэшIоу ашIыгъэм уегъэгушIо. ЗищыIэныгъэ искусствэм езыпхы зышIоигъохэр хэгъэгу, дунэе зэнэкъокъухэм нахьыбэрэ ахэлэжьэнхэм зэнэкъокъур тегъэпсыхьагъ. ИкIэлэцIыкIугъом къыщыублагъэу музыкальнэ Iэмэ-псымэхэм къязыгъэIорэ ныбжьыкIэхэм искусствэм щыпхыращырэ лъагъор щыIэныгъэм къыщятэжьынэу зэхэщакIохэр мэгугъэх.
Iофтхьабзэм къыдыхэлъытэгъэ егъэ­джэн сыхьатхэр ныбжьыкIэ IэпэIасэхэм афызэхащагъ.
Ростовскэ къэралыгъо консерваториеу Рахманиновым ыцIэ зыхьырэм музыкальнэ Iэмэ-псымэхэм къягъэIогъэнымкIэ икафедрэ ипрофессорэу Алексей Снапковыр осэшI купым итхьамэтагъ. Мы консерваторием музыкальнэ Iэмэ-псымэхэм къягъэIогъэнымкIэ иотделение икIэлэегъаджэу, Ростов и Къэралыгъо филармоние иоркестрэу В. Еждик ыцIэ зыхьырэм ихудожественнэ пащэу ыкIи идирижер шъхьаIэу Дмитрий Кохан, АР-м культурэмкIэ изаслуженнэ IофышIэу, искусствэхэмкIэ иколледжэу Тхьабысымэ Умарэ ыцIэ зыхьырэм щылэжьэрэ Сергей Расколец осэшI купым хэтыгъэх.
КIэлэегъаджэхэм яIэпэIэсэныгъэ, ныб­жьыкIэхэм ясэнаущыгъэ ыкIи ашIэрэм фыщытыкIэу фыряIэм осэшIхэр лъэшэу лъыплъагъэх.
Iофтхьабзэм икIэух къызэригъэлъэгъуа­гъэмкIэ, нэбгырэ 15 зэнэкъокъум илауреат хъугъэ, ахэм ащыщэу 8-р Адыгеим щыщых. ТекIоныгъэ къыдэзыхыгъэхэм дипломхэр афагъэшъошагъ.
НэкIубгъор зыгъэхьазырыгъэр Лъэпшъыкъо Фатим.

Сурэтхэр: Iэшъынэ Аслъан.