Аужырэ тхьамэфи­тIум осыбэу къесыгъэм ыкIи къызэрэкIигъэщтыхьажьыгъэм гъогурыкIоныр къагъэ­хьы­лъагъ. Унашъхьэхэм, автомобиль ыкIи лъэс­рыкIо гъогухэм ягъэ­къэбзэн коммунальнэ къулыкъухэм япшъэ­рылъ шъхьаIэу ащ епхыгъэ IофшIэнхэр мафэ къэс зэшIуахых.

Циклон зэфэшъхьафхэр мы мафэхэм зэрэреспубликэу шъхьа­рытыгъэх, чэщырэ тем­пературэр лъэшэу къеIыхы, осыр нахьыбэу къызщесыгъэ Мые­къуапэрэ Мыекъопэ районымрэ зэпымыоу IофшIэнхэр ащэ­кIох. АР-м гидрометеорологиемкIэ и Гупчэ къызэритыгъэмкIэ, осэу къытырилъхьагъэм икуугъэ Мыекъуапэ сантиметрэ 30-м щынэсыгъагъэмэ, Гъозэ­рыплъэ — сантиметрэ 74-м, — бэкIэ алъытэрэ гъунапкъэм, нэсыгъагъ.

Мыекъопэ районым ит псэу­пIэхэм азыфагу къыдэфэрэ шъолъырым ыкIи федеральнэ гъогухэм ягъэкъэбзэн зэшIозы­хыгъэр ДСУ N 3-р ары. Оперативнэ дежурнэм къызэри­тыгъэмкIэ, Лэгъо-Накъэ ыкIи Яворовэ гъэхъунэм къушъхьэ плъапIэу яIэхэм якIолIэрэ гъогухэм мыл пIуакIэ къатенагъэу аукъэбзы. Кавказ къэралыгъо биосфернэ заповедникым къызэритырэмкIэ, ежь къушъхьэ плъапIэхэм осыр бгым нэсэу ателъ. ГущыIэм пае, Гъозэ­рыплъэ кардоным иIофышIэхэм осыр къазгъырхэмкIэ Iуатхъу, чIыопс ухъумапIэм игъогуры­кIуапIэхэр къыхагъэщыжьых. Зы­гъэпсэфыгъо мафэхэм къушъ­хьэм кIонэу зызыгъэхьазырырэ зекIохэм ащ анаIэ тырагъэтын фае.

Мылыр зыгъэткIущт мате­риал тонн 300 гъогухэм атыратэкъуагъ, осым иIухыжьын техникэ 20-м ехъу хэлэжьагъ. Анахь унаIэ зытетын фэе гъогу Iахьхэр, дэкIояпIэхэр ыкIи ехыпIэхэр, лъэмыджхэр ыкIи гъогу зэхэкIыпIэхэр, Мыекъуапэ ­иурам шъхьаIэхэр ыпэ рагъэшъыгъэх. Гъогухэр зыгъэ­къабзэхэрэм чэщырэ Iоф ашIэн фаеу хъущтыгъэ, осыр зэпымыоу къызэресыщтыгъэм къы­хэкIэу. Транспорт уцупIэхэм яекIолIапIэхэр ыкIи лъэсрыкIо гъогухэр хэушъхьафыкIыгъэ техникэкIэ аукъэбзыгъэх. Гъунэ зылъафыхэрэм ащыщ общественнэ транспортыр зэ­рыкIорэ гъогухэр. Осым ыпкъ къикIыкIэ гъогурыкIоныр къэ­зыгъэхьылъэрэ пэрыохъухэр афэмыхъунхэм коммунальнэ къулыкъухэр фэсакъых.
Джащ фэдэу щтыргъукIым ыуж къызыфэбэжьырэм, анахь щынагъор, узфэсакъын фаер унашъхьэмэ апишIыхьэгъэ мыл ткIопсыхэр ары. ГъэIорышIэкIо компаниехэм ыкIи къэлэ унэхэр зытетхагъэхэм яунэшъхьэ ца­кIэхэм ягъэкъэбзэн зэшIуахынэу афагъэпытагъ. Мыекъопэ къэлэ администрацием «Адыгэ макъэм» къызэрэщыраIуагъэмкIэ, осэу къесыгъэм къыздихьыгъэ гумэкIыгъохэр дагъэзыжьы­фэ IофшIэнхэр лъагъэкIотэщтых.

Мыекъуапэ иадминистрацие ипащэу Геннадий Мит­рофановым бизнесым илIыкIо­хэми зафигъэ­загъ тучан ыкIи шхэпIэ IухьапIэ­хэр, ахэр зытет урамхэр агъэ­къэбзэнхэу. Джащ фэ­дэу организацие зэфэшъхьафхэр зычIэт унэхэм апэ­Iулъ автомобиль уцупIэхэр, пчэгухэр, чIэ­хьапIэ­хэр аукъэ­бзынхэу пшъэ­­рылъ афашIыгъ. Гъогубгъухэм къате­нэгъэ осыр Iуатхъужьы.
Зиавтомобильхэр гъогум къы­тезыгъанэхэу гъогу гъэкъэбзэныр, гъогурыкIоныр къэзыгъэ­хьылъэхэрэр гъогурыкIоныр щы­нэгъончъэнымкIэ Къэралыгъо автоинспекциер Мыекъопэ къэлэ администрацием иIэпыIэгъоу къыхагъэщых, ахэм макъэ арагъэIу, яавтомобильхэр а чIыпIэм Iуащых.
Чэщырэ лъэшэу къызигъэщтыкIэ, гъогухэм атыришIыхьэрэ Iумылыр зыгъэткIурэ ре­агентыр коммунальнэ фэIо-фашIэхэр зыгъэцакIэхэрэм джыри аты­ратакъо, ос жъугъэ зэхэлъыр нэужым Iуахыжьы. Джащ фэдэу фэтэрыбэу зэхэт унэхэм ящагухэр, яунашъхьэхэр, пыдза­фэхэр зыщаугъоирэ контейнерхэм яекIолIапIэхэр игъом агъэкъэбзэнхэу ТОС-хэм, гъэIорышIэкIо компаниехэм афагъэ­пытагъ.
ИгъэкIотыгъэу IофшIэнхэр зыщыкIохэрэм ащыщ Мыекъопэ къэлэ паркыр. Шъхьэгощэ нэпкъым уезыщэлIэщт ехыпIэхэр, паркым пхырыкIырэ лъэс лъагъохэр гъэкъэбзагъэх. Урамэу Победэм нэс ыкIи Мыекъопэ къэлэ сымэджэщымкIэ парк дэхьагъур къаукъэбзыгъ. Зэ­кIэмкIи паркым къыгъэгъунэрэ гектар 23-м анаIэ тет.
ГидрометеорологиемкIэ Гуп­чэм къызэриушыхьатырэмкIэ, зыгъэпсэфыгъо мафэхэм гъэтхапэр къызщихьэрэм щегъэ­жьагъэу мафэрэ къэфэбэжьэу ыублэщт, гъушъэщт.
Тэу Замир.