АР-м и ЛIышъхьэу ­КъумпIыл Мурат Рос­имуществэм и ЧIыпIэ гъэ­IорышIапIэу Краснодар краимрэ Адыгэ Рес­публикэмрэ ащыIэм ипащэ игуадзэу Гъунэжьыкъо Аслъан IофшIэгъу зэIукIэ дыриIагъ.

Ащ хэлэжьагъэх АР-м иминистрэхэм я Кабинет и Тхьаматэу КIэрэщэ Анзаур, АР-м мылъку зэфыщытыкIэхэмкIэ и Комитет итхьаматэу Ирина Бочарниковар.
Къэралыгъо мылъкум игъэфедэн, федеральнэ мылъкум епхыгъэ Iофхэм язэшIохынкIэ республикэм хэхъоныгъэ ышIынымкIэ амалэу щыIэхэм ате­гущыIагъэх. АР-м и ЛIышъхьэ къызэрэхигъэщыгъэмкIэ, рес­публикэм исоциальнэ-экономикэ хэхъоныгъэ фытегъэпсыхьэгъэ проектхэр пхырыщыгъэнхэмкIэ, стратегическэ гухэлъхэр зэшIохыгъэнхэмкIэ федеральнэ къулыкъум тапэкIи шIуа­гъэ къэзытыщт зэдэлэжьэны­гъэу дыряIэщтым мэхьанэшхо иI.

ГъэIорышIапIэм ипащэ игуа­дзэ къызэрэхигъэщыгъэмкIэ, мылъкум игъэзекIон епхыгъэ пшъэрылъ шъхьаIэхэм язэшIо­хынкIэ ишIуагъэ къыгъэкIоным фэхьазыр. Гъунэжьыкъо Аслъан къызэриIуагъэмкIэ, АР-м ­мылъку зэфыщытыкIэхэмкIэ и Комитет ягъусэу зэдашIыгъэ инвента­ризацием ишIуагъэкIэ респуб­ликэм имуниципальнэ обра­зованиехэм псэолъэ 14 унэе мылъкоу яIэм къыхэхъуагъ. Ащ нэмыкIэу илъэсэу икIыгъэм рес­публикэм ихэбзэ къулыкъу­хэм адыриIэ зэдэлэжьэныгъэм ишIуагъэкIэ чIыгу Iахьхэу хъыз­мэтымкIэ агъэфедэхэрэм япчъа­гъэ хэпшIыкIэу нахьыбэ ашIын алъэкIыгъ. Илъэс планым проценти 6-кIэ къырагъэхъугъ. Мы аужырэ илъэси 3-м ащ тетэу гъэхъэгъэшIухэр ашIых, нэмыкIэу къэпIон хъумэ, къэралыгъо мылъкум игъэзекIонкIэ Iоф­шIэ­нэу агъэцакIэрэр илъэс къэс нахьышIу мэхъу. Федеральнэ мылъкур гъэфедагъэ зэрэхъугъэм игъэкIотыгъэу лъэплъэх, зыми имые чIыгу Iахьхэр къыхагъэщых, нэмыкI Iофтхьабзэ­хэри зэрахьэх.
«IофшIэнхэр дэгъоу макIох. Федеральнэ гупчэр тигъусэу бэ зэшIотхын тлъэкIыгъэр. Урысые Федерацием и Правительствэ и Тхьаматэ игуадзэу Хуснуллин Марат Шакирзян ыкъом Iэпы­Iэгъоу къытитыгъэм ишIуагъэкIэ проект заулэ дгъэцэкIэн тлъэ­кIыгъ. Мэхьанэшхо зиIэ псэуа­лъэхэр республикэм иунаеу къыIэкIагъэхьагъэх. Джы ахэм япхыгъэ Iофыгъохэр зэшIохы­гъэнхэр ары къэнагъэр. ТапэкIи нахь шIогъэ ин хэлъэу Iоф зэ­рэзэдэтшIэщтым тынаIэ тедгъэ­тын фае. Къэралыгъо мылъкум къыхиубытэрэ псэуалъэхэр зэкIэ хъызмэт Iофтхьабзэхэм нахь игъэкIотыгъэу ащыгъэфедэгъэнхэм мэхьанэшхо иI», — къы­Iуагъ КъумпIыл Мурат.
Адыгэ Республикэм и ЛIышъхьэ ипресс-къулыкъу къытырэ къэбархэмкIэ Тхьаркъохъо Сафыет.