2025-рэ илъэсыр Хэгъэгум иухъумакIо и Илъэсэу Урысыем зэрэщагъэ­нэфа­гъэм ыкIи ТекIоныгъэм ия 80-рэ илъэсэу къэ­бла­гъэрэм афэгъэхьыгъэ тхылъ тхэкIо ныбжьыкIэу Славяна Бушневам къыди­гъэкIыгъ.

«От предков Великой Державы к достойным потомкам России» зыфиIорэм Хэгъэгу зэошхом лIыхъужъныгъэ щызезыхьэгъэ нахьыжъхэм якъэбар къыщыреIотыкIы, лIэшIэгъухэр зэрепхых, къыткIэхъухьэрэ ныбжьыкIэхэм я Хэгъэгу шIу ягъэлъэгъугъэныр щыпхырыщыгъ. Нахьыжъхэр, хэгъэгу зэошхом иветеранхэр ящысэтехыпIэхэу непэрэ ныбжьыкIэхэр псэунхэм фещэх.
— Хэгъэгу зэошхом иветеранхэм афэгъэхьыгъэу бэ тхы­лъым къыдэхьагъэр. Ахэм ащы­щых «Сятэжъ ТекIоныгъэр къы­дэзыхыгъэ дзэкIолIыбэмэ ащыщ», «ЩыIэныгъэм имэфитIу» зышъхьэхэр. Джащ фэ­дэу Адыгеим щыпхыращырэ социальнэ проектэу «Мы идем по дороге мира и согласия» зыфиIорэм фэгъэхьыгъэу тхыгъэ къыдэхьагъ. Джащ фэдэу «Адыгеим илIыхъужъхэм яшъхьэ­гъусэхэр» зыфиIорэ сурэт­техыгъэхэм япроектэу 2013-рэ илъэсым щыIагъэри къыщы­гъэлъэгъуагъ. Мы Iофтхьабзэм изэхэщакIохэм сэри сахэтыгъ, — къыIуагъ Славяна Буш­невам.
ТхэкIо ныбжьыкIэм итхылъ Мыекъопэ тхылъеджапIэм ритыгъ. Ащ къыдэхьагъэхэр Ин­тернетыми ибгъотэщтых.
ДЕЛЭКЪО Анет.