УФ-м и Следственнэ комитет иследственнэ ГъэIорышIапIэу АР-м щыIэм Iоф къинхэм язэхэфынкIэ иотдел иследовательхэм Къэралыгъо автонадзорым ичIыпIэ отделэу Адыгеим щыIэм ипащэ игуадзэ ­ылъэныкъокIэ уголовнэ Iоф къызэIуахыгъ.

Пэщэ IэнатIэр ыгъэцакIэзэ хэбзэн­чъэу къуалъхьэ къазэраIихыгъэм фэшI ар агъэмысэ.
ЗэрагъэунэфыгъэмкIэ, 2022-рэ илъэсым мэлылъфэгъум и 21-м унэе предпринимателэу хьылъэзещэ машинэр зы­гъэIорышIэщтыгъэм административнэ хэ­бзэукъоныгъэ зэрихьагъэу протокол фызэхагъэуцуагъ. Ащ тазырэу сомэ мини 100 пылъ.
2022-рэ илъэсым мэлылъфэгъум и 21-м Къэралыгъо автонадзорым ичIыпIэ отдел ипащэ игуадзэ унэе предпринимателым риIуагъ къуалъхьэу сомэ мин 70-рэ къыритымэ, административнэ протокол фызэхимыгъэуцонэу ыкIи административнэ пшъэдэкIыжь рамыгъэхьынэу. Унэе предпринимателыр ащ къезэгъыгъ ыкIи зыфиIуагъэм фэдиз ахъщэ пащэм исчет фыригъэхьагъ.
ЩынэгъончъэнымкIэ федеральнэ къулы­къум и ГъэIорышIапIэу АР-м щыIэм ыкIи АР-м хэгъэгу кIоцI IофхэмкIэ и Ми­нистерствэ экономикэ щынэгъончъэнымкIэ ыкIи къолъхьэ тын-Iыхыным пэшIуе­кIогъэнымкIэ и ГъэIорышIапIэ зэгъусэхэу Iофтхьабзэу зэрахьагъэхэм къакIэлъыкIоу пэщэ IэнатIэ зыIыгъэу къуалъхьэ зы­штагъэр къаубытыгъ.
Мы мафэхэм следственнэ IофшIэнхэр рагъэкIокIых. Хъулъфыгъэм нэмыкI гори мы Iофым хэщагъэмэ ауплъэкIу. Уголовнэ Iофым изэхэфын лъагъэкIуатэ.
УФ-м и Следственнэ комитет иследственнэ ГъэIорышIапIэу
АР-м щыIэм ипресс-къулыкъу.