Спецназым (ОМОН-р, СОБР-р, ГРУ-р, УIэшыгъэ КIуа­чIэхэм ащыщхэр) иподразделениехэм къулыкъур ащызыхьы­гъэхэу Iэшэ зэIуупIэныгъэу Темыр Кавказым, Сирием, нэмыкI чIыпIэ плъыр­хэм, непэ Украинэм щыкIорэ хэу­шъхьафыкIыгъэ дзэ опера­цием ащыIагъэхэм мы ма­фэр хагъэунэфыкIы.

Мыщ фэдэ цIыфхэм ямэхьанэ сыдигъокIи ины, ахэм Урысыер арэгушхо!
ЗэолIхэм ыкIи ветеранхэм ясэнэхьат епхыгъэ мэфэкIыр 2015-рэ илъэсым къыщегъэжьагъэу УФ-м и Президентэу Владимир Путиным иунашъокIэ тикъэралыгъо щыхагъэунэфыкIы.
— Непэ тицыхьэ телъэу къэт­Iон тлъэкIыщт ти Хэгъэгу ифе­дэхэр ыкIи ищынэгъончъагъэ къэухъумэгъэнхэ фаеу зыхъукIэ, къиныгъохэм апсыхьэгъэ, сыд фэдэрэ чIыпIэ гузэжъогъу ифагъэхэми зэрэзекIощтхэр зышIэрэ зэолIхэр хьазырэу зэрэтиIэхэр, джащ фэдэу мэхьанэ зиIэ пшъэ­рылъхэр зэшIохыгъэнхэмкIэ ти УIэшыгъэ КIуачIэхэм зыми фэ­мыдэ амалышIухэр зэряIэр, — хигъэунэфыкIыгъ В. Путиным.
Къыхэгъэщыгъэн фае хэу­шъхьафыкIыгъэ дзэ операциер Украинэм зыщыкIорэр мэзаем и 24-м илъэсищ зэрэхъугъэр, ащ Адыгеим икIыгъэ нэбгырэ мин пчъагъэхэм щытхъу хэлъэу ядзэ пшъэрылъхэр непэ къыз­нэсыгъэм зэрэщагъэцакIэрэр.
— Адыгеим икIыгъэ дзэкъулы­къушIэ мини 4-м ехъоу хэушъхьа­фыкIыгъэ дзэ операцием хэла­жьэхэрэр къэралыгъо тын зэ­фэшъхьафхэмкIэ къыхагъэщыгъэх, нэбгырэ 500-мэ — ЛIы­хъужъныгъэм иорден, зыпсэ зыгъэтIылъыгъэ нэбгыриплIымэ — «Урысыем и ЛIыхъужъ» зыфиIорэ цIэр къафагъэшъо­шагъ. ЩымыIэжь дзэкIолIхэм щытхъур адэжь, шъхьащэ афэтэшIы. ТиблэкIыгъи, джырэ уахътэми тилIыхъужъхэр тщыгъупшэщтхэп, ахэм ацIэхэр тиурамхэм, тиджапIэхэм ахьы, — къыIуагъ Адыгеим и ЛIы­шъхьэу КъумпIыл Мурат.