ХэушъхьафыкIыгъэ операциехэм акIуачIэхэм ямэфэкI ипэгъокIэу Уры­сые гвардием Адыгэ РеспубликэмкIэ и ГъэIорышIапIэ ипащэу, зэо-зэ­пэуцужьхэм ахэлэжьагъэу, къулыкъу, къэралыгъо тын заулэ къызфагъэ­шъошагъэу, полицием иполковникэу Даур Къэплъан «Адыгэ макъэр» IукIагъ. УIэшыгъэ КIуачIэхэм къулыкъу ащыхьыгъэным, къэралыгъом ищынэгъончъагъэ къэухъумэгъэным ямэхьанэ, Урысые гвардием ихэушъхьафыкIыгъэ подразделение ипшъэрылъхэм, нэмыкIхэми ар къатегущыIагъ.

— Къэплъан, хэушъхьафыкIыгъэ операциехэм акIуачIэхэм я Мафэ имэхьанэ бэхэм ашIэрэп. Хэта ахэм къулыкъу ащызыхьыхэрэр, сыда зыфэгъэзагъэхэр?
— Мыхэм ахэт дзэкъулы­къушIэхэр Iэшэ зэфэшъхьафхэм хэшIыкI афызиIэхэу, шэпхъэ лъагэхэм адиштэрэ IэпэIа­сэхэу сыд фэдэрэ уахъти, чIыпIи анахь пшъэрылъ къинхэр дэх имыIэу, зэкъотхэу зэшIозыхын зылъэкIыщтых. Тикъэралыгъо непэ хэгъэгу пчъагъэ къызыщыпэуцугъэхэ лъэхъаным мыщ фэдэ зэолI шъыпкъэ­хэм ямэхьанэ зыкъеIэты, мы­пшъыжьхэу афэлъэкIыщтыр ахэм зэшIуахы.
Мыщ хэхьэх дзэ спецназыр, СОБР-м иподразделениехэр, ОМОН-м иотрядхэр. Ахэр бзэ­джэшIэным пэуцужьых, опе­ративнэ-лъыхъон, нэмыкI Iоф­тхьабзэхэм ахэлажьэх, мамыр­ныгъэмрэ зыпкъитыныгъэмрэ къаухъумэ.
— Урысые гвардием ­испецназ нахь игъэкIотыгъэу игугъу къэпшIыгъэмэ дэгъугъэ.
— НепэкIэ ар къэзыгъэлъагъохэрэр ухьазырыныгъэ пхъашэ зыIэкIэлъ къулыкъушIэхэр зы­хэхьэрэ хэушъхьафыкIыгъэ отрядэу ОМОН «Фыщт» зыфиIорэр ыкIи лъэтемытэу зыкъэзыIэтырэ отрядэу СОБР «Ошъутенэр» ары. Ахэр Темыр Кавказым ишъолъыр терроризмэм пэуцужьыгъэным епхыгъэу щы­кIогъэ операциехэм пчъагъэрэ ахэлэжьагъэх, джащ фэдэу хэу­шъхьафыкIыгъэ дзэ операциер Украинэм зыщырагъэжьэгъэ апэрэ мафэхэм къащыублагъэу непэ къызнэсыгъэм ядзэ пшъэрылъхэр щытхъу хэлъэу щагъэцакIэх. ТикъулыкъушIэхэм янахьыбэм къэралыгъо ыкIи къулыкъу тын лъапIэхэр къа­фагъэшъошагъэх. Терроризмэм, экстремизмэм ыкIи зэхэщэгъэ бзэджэшIэным апэуцужьыгъэным япхыгъэ пшъэрылъыбэ ахэм агъэцакIэ.
— Къэплъан, о пшъхьэ­кIи хэушъхьафыкIыгъэ операциехэм узэрахэтыгъэм тыщыгъуаз. Сыд фэдэх ахэр?
— Шъхьэихэу зэкIэми ягугъу къэсшIын амал сиIэп. КIэкIэу къэпIон зыхъукIэ, Къыблэ шъо­лъырым, Темыр-Кавказ шъо­лъырым ащыкIогъэ хэушъхьафыкIыгъэ операциехэм илъэсипшI фэдизрэ сахэлэжьагъ. ЧIыпIэ зэфэшъхьафхэм пшъэ­рылъ гъэнэфагъэхэр ащызэ­шIотхыгъ.
— Ащ фэдэ пшъэрылъ къин бгъэцэкIэн зыхъу­кIэ, чIыпIэ щынэгъо ыкIи зэжъухэм уарыфэн зэрилъэкIыщтыр гъэнэфагъэ. Ащ фэдэ зыхъу­рэм, сыда апэ шъхьэм къихьэрэр ыкIи умыщы­нэу ащ фэдэ сэнэхьатыр сыдэущтэу къыхэп­хыгъа?
— Хъулъфыгъэм епэсыгъэ IофшIэнэу ар сэлъытэ. Хэти ежь зэрыкIощт гъогур къыхехы, сэ си Хэгъэгу, ащ ицIыфхэм ящы­нэгъончъагъэ къэсыухъумэныр къыхэсхыгъ.
Тыкъадзыхьэу чIыпIэ зэжъу тызифэрэм, апэ сыгу къэкIырэр сигъусэ цIыфхэр псаоу къызэрэхэсщыжьыщтхэр ары. Сыда пIомэ хэушъхьафыкIыгъэ купым сырикомандирэу щы­тыгъ, ащ дакIоу дзэ пшъэры­лъыр зэшIохыгъэныр сщыгъуп­шагъэп. Сыкъащтэу хъугъэп, сыздакIорэр зэрэщынагъор, хъун ылъэкIыщтыр сшIэщтыгъ. ХэкIыпIэ къызэрэбгъотыщтымкIэ мэхьанэ зиIэр командирым IэкIэлъ шIэныгъэр ыкIи зэо IофымкIэ иIэпэIэсэныгъ.
— «Хэгъэгум ыцIэкIэ тытекIоныр» — мы ­гущыIэхэм хэушъхьафыкIыгъэ дзэ операциехэм ахэлэжьэгъэ дзэкъулыкъушIабэ арэгъуазэ. О сыда узэрыгъуазэрэр?
— «УанэIу ит пыир арэп мэхьанэ зиIэр, сэры ыкIи къыз­готыр ары шъхьаIэр» — мы гущыIэхэм сарэгъуазэ. Узегу­пшысэкIэ, ащ мэхьанэшхо иI.
А гущыIэхэр нахь зыфэгъэхьыгъэхэр хэушъхьафыкIыгъэ подразделениехэм ахэт кIалэхэу пыим пэуцужьхэзэ къэралыгъор къэзыухъумэхэрэр ары. Уигъу­сэхэм шъыпкъэныгъэ, пытэ­ныгъэ, зэкъотныгъэ ахэлъынэу щыт. ЧIыпIэ къин узифэрэм укъызэрамыгъэнэщтым уицы-
хьэ телъ зыхъукIэ, ыпэкIэ улъы­кIотэщт.
— Патриотэу зыолъы­тэжьа? НыбжьыкIэхэр патриотизмэм фэпIу­гъэнхэмкIэ сыда шIэгъэн фаеу плъытэрэр?
— Си Хэгъэгу сырипатриотэу сэлъытэ. СыдигъокIи а гущыIэм мэхьанэ ин есэты. ТицIыкIугъом къыщегъэжьагъэу унагъоми, еджапIэми ары тызэрэщагъэсагъэр. Сэ сиеплъыкIэкIэ, цIыфым ицIыкIугъом къыщыублагъэу унагъом ар щыхалъхьан, ащ лъыпыдзагъэу Iофым фэгъэзэгъэ еджапIэхэм лъагъэкIотэн фае. Мы лъэныкъомкIэ тиныбжьыкIэхэм щы­сэтехыпIэ ашIын икъун лIыхъужъ Адыгеим иI. Патриотическэ пшъэдэкIыжьэу ныбжьыкIэхэм яIэр къагурыIонымкIэ ахэм къаIотэжьыхэрэр зишIуагъэ къа­кIохэрэм ащыщ.
Сэ сшъхьэкIэ дзэ лIыхъужъхэм афэгъэхьыгъэ тхылъыбэмэ сшIогъэшIэгъонэу сяджагъ. ЩысэтехыпIэ сфэхъун икъун дзэкIолIыби тилIакъо къыхэ­кIыгъ. Сятэжъ пIашъэхэр, сятэш на­хьыжъхэр граждан заом ыкIи Хэгъэгу зэошхом ахэлэжьагъэх, «дивизие Iэлым», партизан от­рядхэм ахэтыгъэхэри къахэ­кIыгъ.
— Къэплъан, уахъхтэ къыхэбгъэкIи гущыIэгъу укъызэрэтфэхъугъэмкIэ тхьауегъэпсэу.
Iэшъынэ Сусан.