Тигандбол командэу «АГУ-Адыифыр» Москва къикIыгъэ «Лучым» текIоныгъэр къышIуихьыным лъэшэу пылъыгъэми, ар къыдэхъугъэп.

Урысыем ичемпионат и Суперлигэ ипэшIорыгъэшъ ешIэгъухэм яятIонэрэ уцугъокIэ мы зэIукIэгъур ящэнэрэу щытыгъ тиганд­болисткэхэмкIэ. Ар 32:34-у (16:16) аухыгъ.
ЗэIукIэгъур спорт комплексэу «Ошъутенэм» щыкIуагъ. Апэрэ такъикъхэм къащегъэжьагъэу ар гъэшIэгъоныгъ.
Апэрэ таймым хьакIэхэр апэ итыгъэхэми, счетыр зэфэдиз хъоуи къыхэкIыщтыгъ. Ау зэIукIэгъум иапэрэ Iахь аухынкIэ нэгъэупIэпIэгъу закъо къэнагъэу пчъагъэр зэфэдиз хъугъэ — 16:16.
ЯтIонэрэ Iахьым «АГУ-Адыифыр» нахь дэгъоу ешIэу ыублагъ, хьакIэхэм апэ ишъэу ригъэжьагъ. ЕшIэгъум ыгузэгухэм адэжь тигандболисткэхэр очкоуи 4-кIэ «Лучым» ыпэ итыгъэх, ау шIэхыщэу зыщыгугъыжьыгъэх — такъикъи 3-кIэ хьакIэхэм пчъагъэр зэфэдиз ашIыгъ, 26:26 хъугъэ. ХьакIэхэм якъэблэчъэIутэу Валерия Маревар цыхьэшIэгъоу ешIагъ. ЗэIукIэгъур аухынкIэ та­къикърэ ныкъорэ къэнагъэу тигандболисткэу Анастасия Селиверстовам Iэгуаор зычIенэм, «АГУ-Адыифым» икъэлэпчъэ нэкI къы­дадзагъ — 30:32 хъугъэ. ЗэIукIэгъум икIэух къэсынкIэ нэгъэупIэпIэгъу 12 къэнагъэу моск­вичхэм яешIакIоу Юлия Зюринам тикомандэ икъэлапчъэ джыри зы Iэгуао къыдидзи пчъагъэр 34:32-у ешIэгъур аухыгъ.

Мы зэIукIэгъум анахь ешIэкIо дэгъоу къыхагъэщы­гъэх Елизавета Краснокут­скаямрэ («АГУ-Адыиф») Ксения Закордонскаямрэ («Луч»).
— Лъэшэу тыгу къео къызэрэттекIуагъэхэр. Те­кIо­ныгъэр къыдэтхынэу щы­тыгъ, лъэшэу зэIукIэгъум зыфэдгъэхьазырыгъагъ. Те­кIоныгъэхэм тафэзэщыгъ, мы зэIукIэгъур къэтхьыным тыщыгугъыщтыгъ, ау, гухэкI нахь мышIэми, къыддэхъугъэп, — къытиIуагъ Елизавета Краснокутскаям.
Командэу «АГУ-Адыифым» хэтыгъэхэр:
къэлэпчъэIутхэр: Баскаковар, Гобадзе;
ешIакIохэр: Краснокутскаяр — 7, Бондаренкэр — 6, Хавронинар — 6, Коблыр — 5, Болоба — 3, Къэбжьыр — 2, Алексеевар — 2, Коваленкэр — 1.
Командэу «Лучым» щешIагъэхэр:
къэлэпчъэIутхэр: Моревар, Чипула, Василенкэр;
ешIакIохэр: Федосовар — 9, Закордонскаяр — 8, Зюринар — 4, Коняевар — 3, Шеинар — 3, Черняевар — 2, Селиверстовар — 2, Смирновар — 2, Андриановар — 1.
Гъэтхапэм и 2-м «АГУ-Адыифыр» IукIэщт Москва хэкум къикIыщт командэу «Звездам».
Командэхэр чIыпIэу зыдэщытхэр ыкIи очко пчъагъэу яIэр:

1. «Динамо-Синара» (Волгоград) — 21
2. «Звезда» (Звенигород) — 20
3. «Луч» (Москва) — 15
4. «АГУ-Адыиф» (Мыекъуапэ) — 6
5. «Университет» (Ижевск) — 0.