Заом къикIэу
Хэгъэгу зэошхом ТекIоныгъэр къыщыдэзыхыгъэ дзэкIолIхэм лIыхъужъныгъэ зэрахьэзэ Хэгъэгур къаухъумагъ. Мамыр щыIакIэм къыхэчыгъэ хъугъэхэу, ахэр зыгорэм икIэлагъэх, бын-унагъомэ ахэзыгъэ ты кIасэу, шъхьэгъусэу щытыгъэх.
Iашэр аIыгъэу пыим пэуцущтыгъэхэми къызэранэкIыгъэ щыIэныгъэм ягупсэхэр, яIахьылхэр, яцIыф благъэхэр къыхэнагъэх. Афатхырэ тхыгъэхэр ялъэмыджэу къыраIотыкIырэ гупшысэхэмкIэ алъыIэсыщтыгъэх. Заом къикIыгъэ тхыгъэхэр тидзэкIолIхэм ядунай зыфэдагъэр къизыIотыкIырэ сурэтых.
Джэдгош Кущыку Аисэ ыкъор 1918-рэ илъэсым Кощхьэблэ районым ит къуаджэу Фэдз къыщыхъугъ. Заор къызщежьэгъэ мэфэ шъыпкъэм, мэкъуогъум и 22-м 1941-рэ илъэсым, Дзэ Плъыжьым хэхьагъ. Пулеметнэ полкым идзэкIолIэу хэтыгъ. 1942-рэ илъэсым имэкъуогъу мазэ ар зэуапIэм щыкIодыгъ. Иаужырэ письмэ жъоныгъуакIэм и 29-м 1942-рэ илъэсым ытхыгъагъ.
АР-м и Лъэпкъ музей ихъарзынэщ Кущыку итхыгъитIоу ишъхьэгъусэу Мацэ фитхыгъагъэхэр къычIэнэжьыгъэх. Сабый яIагъэп. ДзэкIолIым итхыгъэхэр музеим 2010-рэ илъэсым иIахьылхэм къыратыжьыгъэх.
Апэрэ тхыгъэр
«АпэрэмкIэ, сэлам фабэ осэхыжьы. ЯтIонэрэмкIэ, уищыIэкIэ-псэукIэ сыкъыкIэупчIэ. Сэ дэгъоу сыщыI… СилъапIэу Маца, сыкъызэрэолъэIурэр, умыгумэкI, угу рэхьатныгъэ игъэлъ, сэ шIэхэу сыкъэкIожьыщт, зэкIэми шIэхэу тыкъэкIожьыщт, нэшIу-гушIоу ущытынэу сыфай.
Сэри ащыгъум сыгу рэхьатыщт ыкIи сыкъэкIожьыщт. Ащ фэдэу зыхъурэм, пцэжъыехэр псым зэрэхэсхэм фэдэу, тыпсэущт. Маца, пыим тыфырикъуни тыкъэкIожьыщт.
СшынахьыкIэу Гъазиз къулыкъу къызэрэздихьырэм сегъэгушIо. Сянэрэ сэтэу Аисэрэ сисэлам сфяхыжь…
16.12.1941 илъэс».
ЯтIонэрэ тхыгъэр
«Сэлам гуапэр осэхы, лъытэныгъэ ин зыфэсшIэу Маца! Сыгу къикIэу коммунистическэ шIуфэс къыпфэсэгъэхьыжьы. Сишъхьэгъусэу Маца, апэу узщызгъэгъуазэмэ сшIоигъор сищыIэкIэ-псэукIэ зэрэдэгъур ары, ори нахьышIоу щыIэр къыбдэхъунэу пфэсэIо. Нэужым сянэрэ сятэрэ уядэIунэу сыпщэгугъы, ахэмэ уядэIу хъумэ, зэкIэри дэгъу хъущт. ..
Сянэ-сятэхэм агу хэмыгъэкIынэу сыолъэIу, ащкIэ щысэ зэкIэми ягъэлъэгъу. Пыир зэхэткъутэни, ТекIоныгъэр къыдэтхыни сыкъэкIожьыщт, къысаж. Атлэскъэр Гъазиз къулыкъу къыздихьыщтыгъ, Маца, джы ар зыдэщыIэр сшIэрэп. Зы шъэогъуи, зы адыгэ кIали сигъусэжьэп. Урыс кIалэхэм сахэт, зэкIэри кIэлэ дэгъу закIэх, ахэм уадэзао хъущт…
29.05.1942 илъэс».