Хабзэ зэрэхъугъэу, НэкIмазэр къызщихьащтым ипэгъокIэу АР-м ыкIи Пшызэ шъолъыр ащыпсэурэ быслъымэнхэм я ДиндэлэжьапIэ шIушIэ Iофтхьабзэхэр регъэкIокIы.

Гъот макIэ зиIэхэм IэпыIэгъу афэхъу зышIоигъохэм апае счет къызэIуахыгъ. ГупыкI зиIэ цIыфхэу мыщ фэдэ унагъохэм гъомылапхъэхэр афащэфынхэр нахь къыхэзыхыхэрэри Iофтхьабзэм къыхэлэжьэнхэ алъэ­кIыщт. НэкIмэзэ мазэм къыкIоцI шIушIэ Iофтхьабзэр рекIокIыщт. Мы мэзэ лъапIэр зэрифэшъуашэу къырагъэхьан алъэкIыным фэшI унэгъо 46-мэ мыщ фэдэ IэпыIэгъу арагъэгъотыгъ.
IэпыIэгъу языгъэкIы зышIоигъохэм АР-м ыкIи Пшызэ шъолъыр ащыпсэурэ быслъымэнхэм я ДиндэлэжьапIэ зыфагъэзэн е телефон номерэу 79189201792-мкIэ (Нурет Абу ыпхъур) теонхэ алъэкIыщт.
Шъугу къэдгъэкIыжьын, 2025-рэ илъэсым быслъы­мэнхэм нэкIыр мэзаем и 28-м рагъэжьэщт ыкIи гъэ­тхапэм и 29-м нэс ар кIощт. Мазэм къыкIоцI быслъы­мэн диныр зылэжьыхэрэм нэкIыр аIыгъын фае, шхэхэ, псы ешъохэ хъущтхэп. А уахътэм шIоу, псапэу цIыфым ышIэрэр мэбагъо. Мы мэзэ лъапIэм Тхьэм гунахьхэр афегъэгъу, псапэри афегъэбагъо. ЦIыфым ипсауныгъэкIэ, идунэететыкIэкIэ федэ фэхъунэу НэкIмазэм бэ хэлъыр: иIиман мэпытэ, зекIокIэ дэйхэм защедзые, Iэпкъ-лъэпкъыр егъэрэхьаты, цIыфхэр зэкъотынхэм, шIу зэрэлъэгъунхэм, гукIэгъу къахэфэным фегъасэх.
АР-м ыкIи Пшызэ шъолъыр ащыпсэурэ быслъымэн­хэм я ДиндэлэжьапIэ зэрэщагъэунэфыгъэмкIэ, зэчатэр сомэ 300-м нахь мэкIэнэу щытэп (зы нэбгырэм телъытагъэу).