Урысыем щынэгъончъэнымкIэ и Федеральнэ ­къулыкъу Адыгэ Респуб­ликэмкIэ и ГъэIорышIапIэ ипащэу Михаил Кемеровым терроризмэм пэшIуекIогъэнымкIэ ­Комиссием изэхэсыгъоу Адыгеим и ЛIышъхьэу КъумпIыл Мурат зэ­рищагъэм къыщиIуагъ SIМ-боксхэр зиунэ изыгъэуцохэрэр зэкъодза­кIохэмрэ Украинэм ихэушъхьафыкIыгъэ ­къулыкъухэмрэ къызэ­рэзфагъэфедэрэр.

ФСБ-м къызэритыгъэмкIэ, хэушъхьафыкIыгъэ дзэ опера­циер зыщыкIорэ лъэхъаным Урысые Федерацием иIофхэр зэщыгъэкъогъэнхэм, хэбзэу­хъумэкIо къулыкъухэр гъэп­лъэхъугъэнхэм атегъэпсыхьагъэу пыим электрон почтэкIэ ыкIи IР-телефониемкIэ терро­ристическэ актхэр зэрэзэра­хьащтхэм фэгъэхьыгъэ къэбар нэпцIхэр жъугъэу аIэкIагъахьэх. АщкIэ сетевой купхэу «сват-сообществэхэмрэ» кол-­гупчэ нэпцIхэмрэ къызфагъэфедэх.
2024-рэ илъэсым IР-телефониер къызфэзыгъэфеда­гъэхэм ахэхъуагъ. Шэпхъэ правовой акт заулэ зэраштагъэм ыпкъ къикIыкIэ IэкIыб доменхэмкIэ къытеонхэу амал къязытырэ IР-телефонием ишлюзхэм Iоф амышIэжь хъу­гъэ, SIМ-картэхэм ягъэфе­дэнкIэ шапхъэхэр агъэпхъэшагъэх. Ау шапхъэу щыIэхэр аукъозэ, гъэпцIакIохэмрэ пы­имрэ SIМ-боксхэр жъу­гъэу Урысыем къыращагъэх.
Адыгеим хэгъэгу кIоцI Iоф­хэмкIэ и Министерствэрэ Уры­сыем щынэгъончъэнымкIэ и Федеральнэ къулыкъу Адыгэ РеспубликэмкIэ и Гъэ­IорышIапIэрэ 2024 — 2025-рэ илъэсхэм зэрахьэгъэ Iофтхьа­бзэхэм SIМ-бокси 4 къаща­Iахыгъ. Украинэм ихэушъхьафыкIыгъэ къулыкъухэм ахэмкIэ террористическэ актхэр зэрэзэрахьащтхэм яхьылIэгъэ къэбар нэпцIхэр аIэкIагъахьэщтыгъэх.

«Республикэм ис нэбгыри 3-мэ лэжьапкIэ къаратыщт фэ­дэу агурагъаIозэ, мессенджерэу «ТелеграмымкIэ» предложение къаIэкIагъэхьагъ ком­паниешхохэм яфэIо-фашIэхэм ягъэцэкIэнкIэ ищыкIагъэ фэдэу алъытэщтыгъэ оборудо­ваниер зыщыпсэухэрэ чIыпIэм ащыгъэуцугъэным фэгъэхьыгъэу. ЫужкIэ SIМ-картэм ехьыщырэу Iоф зышIэрэ SIМ-боксыр почтэкIэ къаIэкIагъэхьагъ, ар Интернетым пашIагъ. ЗэдашIыгъэ зэзэгъыныгъэм тетэу мазэ къэс криптовалютэкIэ доллари 100 фэдиз къагъэхьыщтыгъ. Джащ тетэу амышIахэу цIыфхэр бзэджэшIагъэхэм ахэщагъэхэ хъугъэ», — къыIуагъ Михаил Кемеровым.
Адыгеим и ЛIышъхьэ профильнэ Комитетымрэ хэбзэ къулыкъухэмрэ пшъэрылъ афи­шIыгъ къэбарлъыгъэIэс амалхэр къызфагъэфедэзэ, ИнтернеткIэ ахъщэ къэбгъэхъэныр зэрэщынагъомкIэ цIыфхэм макъэ арагъэIунэу.
«Республикэм ис нэбгырэ пэпчъ гурагъэIон фае ар зэ­рэмытэрэзыр. SIМ-боксыр зиунэ изыгъэуцорэ цIыфыр бзэ­джэшIагъэхэм ахэщагъэ хъун ылъэкIыщт. Мафэ къэс цIыфыбэ зэкъодзакIохэм зэрагъэделэрэр тинэрылъэгъу. Респуб­ликэм исхэм къагурыIон фае къапэблэгъэ цIыфхэм, ягупсэхэри янэIуасэхэри ахэм зэра­хэтхэу, лые арахын зэралъэ­кIыщтыр», — къыIуагъ КъумпIыл Мурат.