Адыгеим игъогухэр зэтегъэ­псыхьэгъэнхэм, щынэгъончъэнхэм, лъэхъаным къыздихьыгъэ шэпхъэшIухэм адиштэнхэм ­республикэр лъэшэу дэлажьэ. Ар АР-м и ЛIышъхьэу КъумпIыл Мурат интернет «хъытыум» щыриIэ нэкIубгъохэм ащыщ къыщыхигъэщыгъ.

— Мы лъэныкъомкIэ IэпыIэгъушхо къытфэхъугъэр лъэпкъ проектэу «Щынэгъончъэ ыкIи шэпхъэшIухэм адиштэрэ гъогухэр» зыфиIорэр ары. Ащ ишIуа­гъэкIэ илъэситфым гъогу Iахь 363-рэ, ар километрэ 506,9-рэ мэхъу, шапхъэхэм адиштэу зэтедгъэпсыхьажьын тлъэкIыгъэ. Ащ нэмыкIэу, социальнэ мэхьанэ зиIэ гъогу псэолъэшхохэу поселкэу Инэм игъогу зэхэкIыпIэр, Мыекъуапэ къэзыухьэрэ гъогум иапэрэ чэзыу, Гъозэ­рыплъэрэ Лэгъо-Накъэрэ, Черниговскэмрэ Тыгъэмыпсырэ зэзыпхыщтхэ гъогухэм яIахьхэр, пстэумкIи 4 мэхъу, тшIыгъэ, — къыкIигъэтхъыгъ респуб­ликэм ипащэ.
Лъэпкъ проектым ишIуагъэкIэ Адыгеим икъалэхэм ягъогухэм япроцент 88-р, шъолъыр мэхьанэ зиIэхэм ыкIи псэупIэхэр зэзыпхыхэрэм япроцент 67-р шапхъэхэм адиштэ хъугъэх. 2023-рэ илъэсым проектым къыдыхэлъытэгъэ IофшIэнхэм пстэумкIи сомэ миллиарди 2,3-рэ апэIуагъэхьагъ.
Джащ фэдэу 2024-рэ илъэсым ­лъэпкъ проектым ишIуагъэкIэ къуаджэу Фэдз илъэмыдж агъэцэкIэжьыгъ, гъогурыкIоным ишапхъэхэр зыукъохэрэр зыгъэунэфырэ камерэу 16, хьылъэзещэ автомашинэхэм арылъыр зыщэчырэ псэуалъэу 2 агъэуцугъ, кIэлэцIыкIухэр гъогу хъугъэ-­шIагъэхэм зэрахэкIуадэхэрэм, шъобжхэр зэрахахыхэрэм япчъагъэ нахь макIэ хъуным фытегъэпсыхьэгъэ Iофтхьабзэхэр зэхащагъэх. ЗэкIэмкIи а IофшIэнхэм сомэ миллиарди 2,2-м ехъу апэIухьагъ.