Мыекъуапэ ыкIи Мыекъопэ районым ащыпсэухэрэр псэу зашъохэрэм ылъэныкъокIэ гумэкIыгъоу щыIэхэм зэкIэри ащыгъуазэх. Тхьамафэм ехъугъэу ар график гъэнэфагъэкIэ къаты, къызщамытырэ мафэхэри ­къыхэкIых.

Мыекъопэ къэлэ администрацием ­ыкIи «Мыекъопэ водоканалым» къызэращаIуагъэмкIэ, къушъхьэхэм лъэшэу къызэращесыгъэм, къызэращыучъыIы­гъэм, температурэр чыжьэу зэрехыгъэм апкъ къикIыкIэ псыр къызхэкIырэ псы­хъоу Цыцэ щтыгъэ, кIуачIэу иIэр мэкIэ дэдэу икIуапIэхэм къарэхьэ.
Iофхэм язытет, охътэ благъэхэм тыз­щыгугъын щыIэмэ зыщыдгъэгъозэнэу «Мыекъопэ водоканалым» тытеуагъ. Ащ иинженер шъхьаIэу Евгений Ефремовым къызэрэтиIуагъэмкIэ, мэфэ бла­гъэхэм нахьышIум ылъэныкъокIэ зэхъо­кIыны­гъэхэр фэхъунхэу гугъапIэ щыIэгоп. Сыда пIомэ Цыцэ псэу дэтыр зэрэщтыгъ, осэу къушъхьэхэм ателъыр зы­гъэ­жъужьын температурэ щыIэп. Арышъ, амалэу щыIэм тетэу пчэдыжьым ыкIи пчыхьэм псыр къатыщт. Графикыр, хабзэ зэрэхъугъэу, къэлэ администрацием иинтернет нэкIубгъохэм къарыхьащт.
— Мы уахътэм тикъушъхьэхэм джыри ащычъыI, чъыIэ дэд пIоми нахь тэрэз. Ащ тетэу псыхъом псэу дэтым къыхэ­хъощтэп. Арэу щытми, ом изытет зэкIэри епхыгъэшъ, ар къызэхъокIынышъ, мэфэ благъэхэм къэфэбэнэу тыщэгугъы, — къыIуагъ ащ.
Синоптикхэм къызэратырэмкIэ, ­охътэ благъэхэм Адыгеим икъушъхьэхэм мафэм фабэр градуси 2 — 3-м нэсэу ащыдэкIоещт, ау чэщым чъыIэу 10 —12 ащыIэщт. Арышъ, псыхъоу Цыцэ жъу­жьынышъ, зэпыу фэмыхъоу псыр къытфэкIонэу гугъэпIэшхо джыри щыIэп.
ХЪУТ Нэфсэт.