2025-рэ илъэсым ищылэ мазэ и 1-м къыще­гъэ­жьа­гъэу лъэпкъ проектыкIэу «Унагъу» зыфиIорэм ипхырыщын АР-м щаублагъ. Ар УФ-м и Президент игукъэкIыкIэ агъэхьа­зырыгъ.

Пшъэрылъ шъхьаIэу иIэр — унагъом иинститут IэпыIэгъу фэхъугъэныр, унэгъокIоцI хэ­бзэшIу зэфыщытыкIэхэр гъэпытэгъэнхэр ыкIи унагъохэм ясоциальнэ Iофыгъохэр зэшIо­хыгъэнхэр.
— Ахъщэ IэпыIэгъу къызэ­ратыщт шъолъырхэм Адыгэ Республикэри ащыщ хъугъэ. 2025 — 2027-рэ илъэсхэм къа­кIоцI ны ныбжьыкIэхэм ыкIи кIэлэцIыкIухэр зэрыс унагъохэм IэпыIэгъу афэхъугъэнымкIэ программэхэм япхырыщын пэ­Iуагъэхьаным фэшI тишъолъыр илъэс къэс сомэ миллион 200 къыфыхагъэкIыщт, — щыха­гъэунэфыкIыгъ АР-м IофшIэ­ным­рэ социальнэ хэхъоны­гъэмрэкIэ и Министерствэ.
Сабыибэ зэрыс унагъохэм IэпыIэгъу афэхъугъэным фэшI республикэм амал зэфэшъхьаф­хэр щагъэцакIэх. Ахэм ащыщ коммунальнэ фэIо-фашIэхэм апкIэ тыгъэнымкIэ компенсациер, кIэлэцIыкIухэм апае ыпкIэ зыхэмылъ Iэзэгъу уцхэр ягъэгъотыгъэныр, кIэлэеджакIохэр ыкIи сэнэхьат зыщызэрагъэ­гъотырэ еджапIэхэм ачIэсхэр общественнэ транспортым ыпкIэ хэмылъэу рызекIонхэр, ящэнэрэ ыкIи ащ къыкIэлъыкIорэ сабый къызфэхъухэрэм рес­пуб­ликэ бюджетым къикIэу зэ­тыгъо ахъщэ тын ятыгъэныр, унэгъо ныбжьыкIэм ыпкIэ хэмылъэу чIыгу Iахь къыратыныр, сабыи-
бэ зэрыс унагъохэм (зигъот макIэхэм) къарыкIыгъэхэм, гъэ­сэныгъэм иучреждениехэу гурыт сэнэхьат зыщызэрагъэгъоты­хэрэм ачIэсхэу дэгъоу еджэхэ­рэм илъэс еджапкIэм ипроцент 30 афэгъэгъугъэныр.
Джащ фэдэу
джыри амалыкIэхэр ­агъэнэфагъэх:
— сабыибэ зэрыс унагъохэм къарыкIыгъэ кIэлэцIыкIухэр нэ­мыкI сэнэхьат феджэжьынхэр;
— музейхэр ыкIи къэгъэлъэ­гъонхэр къаплъыхьанхэр;
— еджэгъу илъэсыкIэм ехъу­лIэу спорт ыкIи еджэн шъуашэр къазэрафащэфыщт субсидиер;
— гъот макIэ зиIэ унагъохэу кIэлэцIыкIухэр зэрысхэм ыпкIэ хэмылъэу анахь ящыкIэгъэ пкъыгъохэр къазыщаратыщт къулыкъоу «Пункт проката» зыфиIорэм иIофшIэн ыублагъ;
— 2025-рэ илъэсым щылэ мазэм и 1-м къыщегъэжьагъэу зэтыгъо ахъщэ тынэу сабый ежэхэрэ бзылъфыгъэхэу мафэрэ еджэхэрэм афагъэнэфагъэр;
— мы илъэсым ищылэ мазэ и 1-м къыщегъэжьагъэу рес­публикэм щыпсэурэ ныхэу зыныбжь илъэс 26-м шIомыкIыгъэхэу апэрэ ыкIи ятIонэрэ сабый къызфэхъухэрэм ахъщэ тынэу афагъэнэфагъэр.
Шъугу къэдгъэкIыжьын, 2012-рэ илъэсым къыщегъэжьагъэу АР-м ящэнэрэ ыкIи ащ къы­кIэлъыкIорэ сабый къызфэхъугъэхэм зэтыгъо ахъщэ IэпыIэгъоу сомэ мин 50 араты. 2024-рэ илъэсым а IэпыIэгъур унэгъо 920-мэ аIукIагъ.
Джы а IэпыIэгъум 2025-рэ илъэсым ищылэ мазэ и 1-м къыщегъэжьагъэу фэдитIу къы­хэхъуагъ ыкIи сомэ мини 100-м нэсыгъ.
— Мыщ фэдэ екIолIакIэ зиIэ IофшIэным шIуагъэ къеты, сабыибэ зэрыс унагъохэм япчъа­гъэ хэхъо. Мы уахътэм ехъулIэу республикэм ащ фэдэ унэгъо мини 9,6-м ехъу щэпсэу. Лъэпкъ проектыкIэу «Унагъу» зыфиIорэм ипхырыщын рес­публикэм идемографие изытет нахьышIу шIыгъэным фэIоры­шIэщт, — къыIуагъ Адыгеим и ЛIышъхьэу КъумпIыл Мурат.