ХэушъхьафыкIыгъэ дзэ операцием хэлэ­жьагъэхэм ыкIи ахэм яунагъохэм апае ­«IофшIэнхэм яермэлыкъ» къэралыгъо фондэу «Хэгъэгум иухъумакIохэр» зыфиIорэм ишъолъыр къутамэ тыгъуасэ щыкIуагъ.

Ащ иIэпыIэгъугъ цIыфхэм IофшIэн ягъэгъотыгъэнымкIэ Адыгэ республикэ Гупчэр.
ХэушъхьафыкIыгъэ дзэ операцием иветеранхэм ыкIи ахэм яунагъохэм арысхэм IофшIэн ягъэгъотыгъэным, икIэрыкIэу егъэджэжьыгъэнхэм япхыгъэ Iофыгъохэр фондэу «Хэгъэгум иухъумакIохэр» зыфиIорэм ишъолъыр къутамэ инэплъэгъу ригъэкIыхэрэп. Ащ ишыхьат я 4-у «IофшIэнхэм яермэлыкъ» зэрафызэхащэрэр.
IофшIэн ягъэгъотыгъэнымкIэ республикэ Гупчэм иIофышIэу Диана Гуцало къызэриIуагъэмкIэ, непэрэ Iофтхьабзэм IофшIэпIи 4-мэ ялIыкIохэр къырагъэблэгъагъэх. IофшIэн лъыхъоу къякIолIагъэхэм ахэм къафаIотагъ IофшIэпIэ чIыпIэхэу щыIэхэр зыфэдэхэр, ащ зэрэIухьащтхэр, сэнэхьат ыкIи гъэсэныгъэ тедзэ зэрагъэгъотын зэралъэкIыщтыр.
— Непэрэ ермэлыкъым къеблэгъагъэх ООО-хэу «ЭкоЦентр», «Комплекс-Агро» зыфиIохэрэр, кIэпсэшI фабрикэр, щэ заводэу «Тамбовскэр». Мыхэм IофшIэпIэ чIыпIэ зэфэшъхьафэу яIэхэм специалистхэр къатегущыIагъэх. ХэушъхьафыкIыгъэ дзэ операцием иветеранхэм, ахэм яунагъохэм арысхэм нахь къякIунэу алъытэрэр къыхахыщт. Мы мафэм къемыкIолIэшъугъэхэм занкIэу ти Гупчэ зыкъыфагъэзэн алъэкIыщт, — хигъэунэфыкIыгъ Диана Гуцало.
— Фондыр лъэныкъо зэфэшъхьафэу зыфэгъэза­гъэхэм ащыщ дзэ операцием иветеранхэм, ахэм яунагъохэм арысхэм IофшIэн ягъэгъотыгъэныр. Ермэ­лыкъым ишIуагъэкIэ гъэсэныгъэм иучреждениехэм ялIыкIохэм, IофшIэн къязытышъущтхэм ветеранхэр аIукIэнхэшъ, амалэу агъотын алъэкIыщтхэм акIэупчIэнхэ алъэкIы. Дзэ операцием илIыхъужъхэм янахьыбэм аныбжьыкIэ Iоф ашIэн амал яI ыкIи яунагъохэм ящыкIагъэр арагъэгъотынэу ахэр фаех, ащ дакIоу ясэнэхьатхэм ахагъахъо ашIоигъу, — къыхигъэщыгъ шъолъыр фондым ипащэу ПIатIыкъо Аслъан.
Фондэу «Хэгъэгум иухъумакIохэр» зыфиIорэм ишъо­лъыр къутамэ Iоф зишIэрэм къыщегъэжьагъэу IофшIэн лъыхъоу нэбгырэ 18-мэ зыкъыфагъэзагъ, 14-мэ Iоф­шIэпIэ чIыпIэ къафагъотыгъ.
Непэ IофшIэн зищыкIагъэу закъыфэзыгъэзагъэхэм ащыщэу Игорь Гилевым гущыIэгъу тыфэхъугъ.
— Шъолъыр фондым Iофыгъо зэфэшъхьафхэмкIэ зэдэлэжьэныгъэ зыдысиIэр бэшIагъэ. Ау IофшIэн сылъыхъоу апэрэ зыкъызэрэфэзгъэзагъэр, сыда пIомэ мы илъэсым ищылэ мазэ ыкIэхэм запасым сыкIожьыгъэ къодый. Зэпэуцужьхэм сыряветеранэу зэрэщытым нэмыкIэу, сэкъатныгъи сиI. УIагъэу къыстещагъэхэм апкъ къикIыкIэ слъэкъо джабгъу симыIэжьынэу хъугъэ. Ау ащ щыIэныгъэр къыщыуцурэп, ищыкIэгъэ реа­билитациер скIугъэ, протезым сытетэу щыIэкIэ-псэукIэм сыхэгъозэжьыгъ. Спортым сыпылъ, мэзитIукIэ пауэрлифтингымкIэ Урысыем ичемпионатэу щыIэщтым сыхэлэжьэнэу зысэгъэхьазыры. Джы администра­тивнэ IофшIэн горэ къысэкIунэу згъотымэ сигуапэу Iоф сшIэнэу закъыфэзгъэзагъ, — къыIуагъ Игорь Гилевым.
Мы мафэм «IофшIэнхэм яермэлыкъ» къекIолIэн зымылъэкIыгъэхэр фондэу «Хэгъэгум иухъумакIохэр» зыфиIорэм ишъолъыр къутамэ иIофышIэ мафэ къэс сыхьатыр 11-м къыщегъэжьагъэу 1-м нэс зыфагъэзэн алъэкIыщт (ур. Пролетарскэр, 353).
Iэшъынэ Сусан.