Урысыем ипервенствэу зыныбжь илъэс 15-м къемы­хъугъэ пшъэшъэжъыехэр зыхэла­жьэрэм Мыекъопэ спорт еджапIэм зыщызыгъасэхэрэм дэгъоу зыкъыщагъэлъэгъуагъ — финалныкъор къызэра­нэ­кIи, зэнэкъокъум ифинал ихьагъэх.

Тренерэу Валерий Гончар ыгъэсэрэ коман­дэм тигъэгушIуагъ.
Финалныкъом хэхьэрэ зэIукIэгъухэр къалэу Волгоград щыкIуагъэх. С. Джэнчатэм ыцIэ зыхьырэ спорт еджапIэу N 1-м игандболисткэ ныбжьыкIэхэм ащ зэIукIэгъуитф щыряIагъ, зэкIэри къахьыгъ. Ахэр атекIуагъэх Астрахань (19:12), Кемерово (18:8), Ростов хэкум (18:17) ыкIи Москва (18:9) якомандэхэм. Волгоград хэкум икомандэ зыдешIэхэм, очко пчъагъэу яIэр зэфэдизэу (16:16) зэIукIэгъур аухыгъ.
Финалныкъом изэфэхьысыжьхэмкIэ, апэрэ чIыпIэр Мыекъуапэ икомандэрэ бысымхэм яемрэ зэдагощыгъ.
Мэлылъфэгъум и 27-м къыщыублагъэу жъоныгъуакIэм и 7-м нэс къалэу Астрахань щыкIощтых кIэух ешIэгъухэр.