Мыекъопэ баскетбол командэу «Динамо-МГТУ-р» тIогъогогъо тикъалэ щыIукIагъ командэу «Чебоксарские ястребы». ЕшIэгъуитIури хьакIэхэм ахьыгъ.

ЗэIукIэгъум иублэгъум командитIури лъэшэу текIоныгъэм фэ­банэхэу аублагъ. «Динамо-­МГТУ-р» бэрэ ыпэкIэ илъыгъ, ау хьакIэхэм дэгъоу зыкъаухъумэщтыгъ, ащ ишIуагъэкIэ апэрэ ешIэгъу уахътэр 10:20-у аухыгъ, хьакIэхэр нахь лъэшыгъэх.
ЯтIонэрэ ешIэгъу уахътэм хьакIэхэм хэукъоныгъэу ашIыхэрэр къызфигъэфедэзэ, тикомандэ пчъагъэр зэблихъуным лъэшэу пылъыгъ ыкIи а ешIэгъур 29:28-у «Динамо-МГТУ-м» къыхьыгъ.
ЗэIукIэгъур аухынкIэ нэгъэу­пIэпIи 4 къэнагъэу тикомандэ 64:62-у ешIэгъур ыхьыщтыгъ, ау хьакIэхэм а уахътэм къыкIоцI пчъагъэр зэфэдэ ашIыгъ ыкIи охътэ тедзэ къаратынэу хъугъэ.Джащыгъум хьакIэхэм янасып къыхьыгъ, нахь лъэшхэу къы­чIэкIыгъ, 71:78-у ешIэгъур ­аухыгъ.
Анахь ешIэкIо дэгъоу хьакIэхэм якомандэу «Чебоксарские ястребы» къыхагъэщыгъэх Вадим Федькинымрэ Евгений Новоселовымрэ (очко 15 зырыз). «Динамо-МГТУ-м» — Константин Клементьевыр (очко 25-рэ).
Непэрэ неущырэ «Динамо-МГТУ-р» Мыекъуапэ щыIукIэщт командэу «ЦСП-Химки» (Москва хэку).