ТIопсэ муниципальнэ шъолъырым ипащэ анахь пэIудзыгъэ адыгэ къуаджэм щыIагъ.

ЦIыфмэ уахэхьаным, уадэгущыIэным Сергей Бойко мэхьанэшхо реты ыкIи ежь ыIэ илъ IофышIэхэри ащ фэдэу псэунхэм гъунэ лъефы. IэпыIэгъу зищыкIагъэу е зигъо Iофыгъо горэм фэгъэ­хьыгъэу къеуалIэрэ пэпчъ едэIушъу, ыкIи зэхехышъу, арэущтэу зэкIэхэри щытын фаеу ащ елъытэ. Муниципалитетым ипащэ ежь ышъхьэкIэ цIыфхэм аIокIэ, егъэблэгъэнхэми, цIыф зэхахьэхэми а Iофтхьабзэр ащызэхещэ. Джащ фэдэу чIыпIэ зыгъэIорышIэжьыпIэмэ яобщественникхэм, ветеран, ныбжьыкIэ ыкIи лъэпкъ организациехэм ялIыкIохэм зэIукIэхэр пащэм адызэхещэх. Ащ фэдэ Iофыгъохэм яшIуагъэ къэкIо, цIыфмэ ягукIаехэр занкIэу къылъэIэсых, хэкIыпIэхэмкIэ зэхэгущыIэжьых, IэпыIэгъу зэрафэхъущт шIыкIэхэри ащ елъыты­гъэу къэнафэх.

Хабзэм ынаIэ зытыригъэтыхэрэм къоджэ псэупIэхэр ащыщых. БэмышIэу Сергей Бойко къушъхьэм хэт къуаджэу Псыбэ щыIагъ, къоджэдэсмэ ягумэкIыгъохэм защигъэгъозагъ. Муниципалитетым ипащэ чIыпIэрысмэ адэгущыIагъ, мэхьанэ зиIэ псэуалъэхэр къыплъыхьагъэх.
«Псыхъоу Псыбэ къыпэIулъ гъогоу электричествэр къэзытырэ линиер зэрыкIорэр зэрецохъохырэр анахь гумэкIыгъо инэу къыхагъэщыгъ. Нэпкъыр гъэпытэ­гъэн фае. Охътабэ тырамы­гъашIэу специалистмэ шIыкIэ-хэкIыпIэхэр ащ къыфагъотынхэшъ, ахэр район пащэм фаIопщыжьыщтых, — къыщаIотагъ шъо­лъыр администрацием. — Ащ фэшъхьафэу Сергей Бойко къариIуагъ нэп­къым чъыгэу къырихьылIа- гъэхэр Iухы­жьыгъэнхэмкIэ ыкIи зэрэпсаоу ар укъэ­бзы­жьыгъэнымкIэ кIуачIэу ищы­кIагъэр зэхэфыгъэнэу, ащ къы­кIэлъыкIоу IофшIэнхэр егъэжьэгъэнхэу».
Транспортымрэ гъогу хъызмэтымрэкIэ муниципалитетым и ГъэIорышIапIэ иIофышIэхэм Сергей Бойко унашъоу афишIыгъэм елъытыгъэу, Iуашъхьэм къечъэхырэ псэу гъогум къытелъадэрэм ыкIи псыхъоу ащ изы чIыпIэ къыкIэлъа­дэрэм нэмыкI лъагъохэр афашIыщтых, дырагъэкIокIыщтых, электричествэм епхыгъэ пкъэухэм алъапсэхэр агъэпытэщтых.

«Джащ фэдэу специалистхэм лъэмыджэу къуаджэм екIуа­лIэхэрэр зэкIэ къаплъыхьа- щтых, — къащитхыгъ со­циальнэ хъытыухэм муниципалитетым ипащэ. — Ахэм язытет зызэдгъэшIэрэ ужым зыщыдгъэцэкIэжьыщтхэ уахътэр дгъэнэфэщт. Псыбэ екIурэ гъогум мыжъо зэрэтеттэкъощтым, зэрэдгъэтэрэзыжьыщтым щэч хэлъэп».
Къушъхьэм хэс къуаджэм епхыгъэ Iофыгъо зэфэшъхьафхэм атегущыIагъэх, ахэр культурэм, гъэсэныгъэм ыкIи спортым афэгъэхьыгъагъэх.
«Культурэм и унэу Псыбэ дэтым къоджэдэсхэр щызэрэугъоихэрэ къодыеп, адыгэ культурэм игупчэу ар яI. Унашъхьэм гъэцэкIэжьынхэр ищыкIа­гъэх, — къыхигъэщыгъ муниципалитетым ипащэ. — Сметэр дгъэхьазырыщт. Джащ фэдэу ащ хэт унэхэм ягъэцэкIэжьыни къыдэтлъытэщт. Чылэм спорт площадкэ ищыкIагъ. Ащ изэте­гъэпсыхьанкIэ планыр къызэхагъэуцонэу сиIофшIэгъухэм афэзгъэпытагъ. Ащ фэшъхьафэу, Псыбэ дэт еджапIэу N 17-м дзюдомрэ самбэмрэ зыщара­гъэхьыщт секцие щызэхэщэгъэным игугъапIэ щыI. Мы уахътэм тренерым тылъэхъу. Мы гъэсэныгъэ учреждениеми гъэцэкIэжьынхэр ищыкIагъэх. Тибюджет е краим ием ащ пэIухьащт мылъкур къахэ­тхыщт».
Ныбэ Анзор.
Сурэтхэр ТIопсэ муниципальнэ шъо­лъырым иадминистрацие иех.