ТкIопс щтыгъэхэм шъуафэсакъ
Мы мафэхэм бэрэ къызэресырэм къыхэкIэу унашъхьэхэм ыкIи псырычъапIэхэм ткIопс щтыгъэхэр апишIыхьагъэх.
Жьым ифэбагъэрэ ичъыIагъэрэ зэрэзэпеохэрэм апкъ къикIэу мыл пыткIуафэхэр унэшъхьэ цакIэхэм къапызынхэм ищынагъо къэуцу. Унашъхьэхэм ателъ осыри ахэм къыздырахьыжьэн алъэкIыщт. Ащ фэдэхэм уафэмысакъымэ, зэрар ахэпхыщт, цIыфэу урамым тетхэмкIи ахэр щынагъох.
Мыекъопэ къэлэ администрацием къызэритырэмкIэ, унашъхьэхэм апышIыхьэгъэ ткIопс щтыгъэхэр пыхыгъэнхэр нахь агъэлъэшыгъ. ГъэIорышIэкIо компаниехэм къалэм дэт унэшхохэр къаплъыхьанхэу, мыл зыпишIыхьагъэхэр, осыбэ зытелъхэр гъэкъэбзэгъэнхэу, ахэм унаIэ атеозыгъэдзэрэ кIапсэхэмкIэ къэшIыхьэгъэнхэу унашъо афашIыгъ. ГъогурыкIохэми къяджэх зыфэсакъыжьынхэу.
Зиунашъхьэ зымыгъэкъэбзагъэхэм непэрэ мафэм ехъулIэу а унашъор зэрыт тхылъи 120-рэ афагъэхьыгъ, зэрагъэцакIэрэми лъэплъэх. Мы IофымкIэ зипшъэрылъхэр зымыгъэцэкIэрэ ГъэIорышIэкIо компаниехэм тазырэу сомэ мин 300 атыралъхьащт.