УФ-м культурэмкIэ и Министерствэрэ Росконцертымрэ кIэщакIо зыфэхъугъэхэ фестиваль-ермэлыкъэу «Сделано в России» зыфи­Iорэр Зэхэт Араб Эмиратхэм, Абу-Даби мы мафэхэм щэкIо. АР-м и Концерт зэхахьэ хэтэу лъэпкъ орэдымкIэ ыкIи къашъомкIэ къэралыгъо ан­самблэу «Ислъамыер» ащ хэлажьэ.

Фестивалым иIофшIэгъу мэфитфым Адыгеим икIыгъэ коллективым концертих къы­тыгъ.
«Ислъамыем» нэмыкIэу фестиваль-ермэлыкъым икъэгъэлъэгъонхэм ахэлажьэ Москва дэт Къэралыгъо театрэу «Русская песня» зыфиIоу Надежда Бабкинар зипащэм хэхьэрэ ансамблэу «Славяне». Къэралыгъо къэшъокIо ыкIи орэдыIо купхэм анэмыкIэу самодея­тельнэ ыкIи кIэлэцIыкIу кол­лективхэр программэм хагъэ­хьагъэх. ЗэхэщакIохэм япшъэ­рылъ шъхьаIэр Урысыем ­лъэпкъ культурэ зэфэшъхьафэу иIэхэр ягъэшIэгъэныр, лъэпкъ орэдхэмкIэ, Iэпэщысэ шIыгъэхэмкIэ лъэпкъ культурэ лъагэм ишап­хъэ­хэр къэгъэлъэгъогъэнхэр ары.
«Ислъамыем» ихудожест­веннэ пащэу, АР-м искусст­вэхэмкIэ изаслуженнэ IофышIэу Нэхэе Азамат ансамблэм игъус. Ащ «Адыгэ макъэм» къы­зэрэфиIотагъэмкIэ, къэгъэлъэгъонхэр фестиваль-ермэлыкъым ипчэгу щэкIох. «Ислъамыем» иконцерт пэпчъ сыхьатым къе­хъурэ макIо.
— ЦIыфхэм лъэпкъ культурэу Урысыер зэрэзэхэтыр ашIогъэшIэгъон. Фестивалым цIыфыбэ къекIолIагъ. Концертхэр бзитIукIэ — урысыбзэкIэ ыкIи инджылызыбзэкIэ макIох. ­Адыгэ лъэпкъ орэдымрэ къашъомрэ типрограммэ зэрэзэдыхэтхэр лъэшэу агу рехьы. Тиартистхэм къаIорэ ижъырэ орэдхэм анэмыкIэу 2025-рэ илъэсыр Хэ­гъэгум иухъумакIо и Илъэсэу зэрагъэнэфагъэм къыхэкIэу зэо илъэсхэм аусыгъэ орэдхэр ти­къэгъэлъэгъонхэм ахэдгъэхьагъэх. Джащ фэдэу Хэгъэгум иухъумакIо и Мафэ «Зэо илъэс­хэм яорэдхэм япопурри» зыфиIорэ концерт фестивалым ипрограммэ къыхаслъхьи, къа­фэттыгъ. Лъэшэу ягуапэ хъугъэ. Адыгеир ащкIэ къахэщыгъ, — хигъэунэфыкIыгъ Нэхэе Азамат.
«Ислъамыем» ипащэ къызэ­рэтиIуагъэмкIэ, Абу-Даби щы­псэу­рэ тилъэпкъэгъухэри къэгъэ­лъэгъонхэм къякIуалIэх, ахьа­кIэнэу рагъэблагъэх, анаIэ къа­тырагъэты. Непэ ­фестивалым иаужырэ маф, неущ тиартистхэр гъогу къытехьажьыщтых.