Адыгеим и ЛIышъхьэу КъумпIыл Мурат АР-м терроризмэм пэ­шIуе­кIогъэнымкIэ и Комиссие изэхэсыгъо зэрищагъ.

Iофыгъоу зытегущыIагъэ­хэм ащыщых транспортыр щынэгъончъэныр, хьапсдэс­хэм экстремизмэ нэшанэ зиIэ бзэджэшIагъэхэм ахэщагъэ мыхъунхэр, террориз­мэм пэшIуекIорэ IофшIэным шIуагъэу къытырэм зы­къе­гъэIэтыгъэныр ыкIи нэ­мыкIхэр.
Урысыем и МВД транс­портымкIэ и Краснодар линейнэ гъэIорышIапIэ ипащэу Вячеслав Колесниковыр къы­зэгущыIэм, транспорт инфраструктурэм къыхиубы­тэрэ псэуалъэхэр террориз­мэм щыухъумэгъэнхэмкIэ Iофтхьабзэу зэрахьэхэрэр ары анахьэу ынаIэ зыты­ригъэтыгъэр. Ащ къызэрэхи­гъэщыгъэмкIэ, хэушъхьафыкIыгъэ дзэ операциер заублагъэм къыщегъэжьагъэу терроризмэм епхыгъэ бзэ­джэшIагъэхэм афэгъэхьыгъэ къэбарэу къаIэкIахьэрэр на­хьыбэ хъугъэ. Темыр-Кавказ мэшIоку гъогум ипсэуа­лъэхэм ащ фэдэ терактхэр къащымыхъунхэмкIэ Iофтхьэ­бзэ гъэнэфагъэхэр зэрахьагъэх. Адыгеим чIыпIэу ыубытырэм террористическэ Iоф­тхьабзэхэр щызэрарамыгъэ­хьанхэ алъэкIыгъ.
ГъэIорышIапIэм IофшIэн гъэ­нэфагъэ егъэцакIэ экстремизмэм къыфэджэрэ сайтхэм арымыхьанхэу шIыгъэнхэмкIэ. ГущыIэм пае, 2024-рэ илъэсым гъогогъуи 180-м ехъурэ ащ фэдэ сайтхэм ары­хьанхэ амылъэкIынымкIэ, Iофтхьэбзэ гъэнэфагъэ­хэр зэрахьагъэх. Экстремиз­мэм хэщагъэ мыхъунхэм пае тхыгъэ зэфэшъхьафхэр ыкIи видеороликхэр агъэфедэх, Iа­хьзэхэлъ обществэу «РЖД-м» ­илIыкIохэр ягъусэхэу «Мэ­шIокугъогу транспортым иин­фраструктурэ къыхиубытэ­хэ­рэр бзэджэшIагъэхэм ащыу­хъумэгъэнхэм фэгъэхьыгъ» зыфиIорэ тхылъ цIыкIухэр зэхагъэуцуагъэх ыкIи аха­тIупщыхьагъэх.
Мыекъуапэ имэшIоку­гъогу вокзал уплъэкIун Iоф­хэр щагъэцакIэх, псын­кIэу кIорэ мэшIокухэр къагъэгъунэх. Мыекъуапэ дэт вокзалым къырахьы­лIэрэ хьылъэхэм яуплъэ­кIункIэ интроскопыр, видеолъыплъэнымкIи пкъыгъо гъэнэфагъэхэр агъэфедэх. Транспорт полицием иIофышIэхэри мэшIокухэм адитIысхьэхэу къыхэкIы.
АР-м псэолъэшIынымкIэ, транспортымкIэ, псэупIэ-­коммунальнэ ыкIи гъогу хъызмэтымкIэ иминистрэу Валерий Картамышевым къызэрэхигъэхъожьыгъэмкIэ, терроризмэм пэшIуе­кIо­рэ Комиссием хэтхэм транспортым ищынэгъончъагъэкIэ ренэу Iофтхьэ­бзэ гъэнэфагъэхэр зэрахьэх. Автовокзалхэмрэ мэшIокугъогу вокзалхэмрэ техникэ амалхэр яIэх цIыфхэри, ахэм къыздырахьакIырэ хьылъэхэри ауплъэкIунхэм пае.
КъэгущыIагъэхэм къыха­гъэщыгъэхэм къатегущыIэзэ КъумпIыл Мурат къызэ­риIуагъэмкIэ, щынэгъончъэ­ныр щыIэным, Iофыгъоу гумэкIыгъохэр къэзыхьын зылъэкIыщтхэр дэгъэзы­жьыгъэнхэм апае транспортым епхыгъэ псэолъэ пстэуми ащызэрахьан фэе Iофтхьабзэхэр икъоу гъэ­нэфэгъэнхэ фае. Адыгэ Республикэм иминистрэ­хэм я Кабинет пшъэрылъ фишIыгъ а Iофыгъом ынаIэ тыригъэтынэу. ХэушъхьафыкIыгъэу къащыуцугъ вокзалхэм къапэIулъ чIыпIэхэм теплъэу яIэри на­хьышIу шIыгъэнымкIэ зе­хьэгъэн фэе Iофыгъохэм.
«Вокзалхэр — респуб­ликэм икъэлэ шъхьаIэ икъэлапчъэх, Мыекъуапэрэ Адыгеимрэ зэзыгъэлъэгъу зышIоигъо цIыфхэу къакIо­хэрэми ахэм къащыра­гъажьэ. Арышъ, ахэр ­икъоу ухъумагъэу щытынхэ ыкIи теплъэ дахэ яIэн фае», — къыхигъэщыгъ АР-м и ЛIышъхьэ.
Пщыныжь зыхьырэ цIыф­хэр экстремизмэм хэщагъэ хъунхэмкIэ амалэу агъотхэрэр афыпыбзыкIыгъэнымкIэ Iофтхьабзэхэм япхыгъэ Iофыгъохэми зэхэ­сыгъом хэлажьэхэрэр ате­гущыIагъэх. Урысыем и ФСИН и ГъэIорышIапIэу Адыгэ Республикэм щыIэм ипащэу Мерген Тубито-
вым къызэриIуагъэмкIэ, мыщ иучреждениехэм нэ­бгырэ 53-рэ ачIэс. Терроризмэ ыкIи экстремизмэ нэшанэ зиIэ бзэджэшIагъэ­хэр зэрэзэрахьагъэм пае агъэтIысыгъэхэм нахь лъэ­шэу алъэплъэх.
Хьапсдэсхэр экстремизмэм хэщагъэ мыхъунхэм пае ахэр гъогу тэрэз тещэжьыгъэнхэм дэлэ­жьэ­рэ учреждениехэм яадминистрациехэр шэпхъэ гъэ­нэфагъэу щыIэхэр укъуагъэ мыхъунхэм лъэплъэх, экстремизмэ нэшанэ зиIэ ма­териалхэр къыздэхьэрэ тхылъхэм яуплъэкIун зэхащэ. Хьапсдэсхэм лекцие­хэм къафеджэх, дин ыкIи общественнэ организацие­хэм ялIыкIохэм зэIукIэгъу­хэр ахэм адашIых.
Iофыгъоу зытегущыIагъэ­хэм джащ фэдэу ащыщых цIыф лъэпкъ зэфэшъхьаф­хэм къахэкIыгъэхэмрэ дин зэмылIэужыгъохэр зы­лэжьхэрэмрэ азыфагу илъ зэфыщытыкIэхэр, сепаратизмэм щыухъумэгъэнхэр, лъэпкъ зэхэдзым инэшанэ­хэр дэгъэзыжьыгъэнхэмкIэ Iофтхьабзэхэр зэшIохы­гъэнхэр. МыщкIэ къэгущы­Iагъэх АР-м хэгъэгу кIоцI IофхэмкIэ иминистрэу Олег Безсмельницынымрэ ­Адыгэ Республикэм лъэпкъ Iоф­хэмкIэ, IэкIыб къэралхэм ащыпсэурэ тилъэпкъэгъу­хэм адыряIэ зэпхыныгъэ­хэмкIэ ыкIи къэбар жъугъэм иамалхэмкIэ и Комитет итхьаматэу Шъхьэлэхъо Аскэррэ. Ахэм къы­зэраIуагъэмкIэ, АР-м шIэ­ныгъэмрэ гъэсэныгъэм­рэкIэ и Министерствэ, апшъэрэ еджапIэхэм гъу­сэныгъэ адыряIэу къэбар-­просветитель Iофтхьабзэ­хэр ныбжьыкIэхэм ренэу адызэрахьэх. Адыгэ культурэм и Мафэ, урыс культурэм и Мафэ, лъэпкъ зыкIыныгъэм и Мафэ, культурэм ыкIи гъэсэныгъэм япхыгъэ Iофтхьабзэхэр зэхащэх.
«Общественнэ зыпкъитыныгъэр, Адыгеим щы­псэурэ цIыф лъэпкъ зэфэшъхьафхэм мамырныгъэрэ зыкIыныгъэрэ ахэлъыныр — ахэр ары тиреспубликэ хэхъоныгъэ ышIынымкIэ, цIыфхэм ящыIакIэ нахьышIу хъунымкIэ лъэпсэкъэкIуапIэу шытхэр. Ары анахь баиныгъэ инэу тиIэр ыкIи хэбзэухъумэкIо, гъэцэкIэкIо къулыкъухэмрэ общест­веннэ организациехэмрэ тызэгъусэу къэтыухъумэн фаер», — къыхигъэщыгъ АР-м и ЛIышъхьэ.
Терроризмэм пэшIуе­кIогъэнымкIэ шъолъырхэм Iофэу ашIэрэр уахътэм ди­штэу нахь игъэкIотыгъэу гъэпсыгъэнымкIэ къэгущы­Iагъ терроризмэм пэшIуе­кIорэ Комиссиеу АР-м щызэхэщагъэм иаппарат ипащэу ЛIый Азамат.
АР-м и ЛIышъхьэ ипресс-къулыкъу
къытырэ къэбархэмкIэ Тхьаркъохъо Сафыет.