Сэнэхьат ухьазырыныгъэмкIэ шъо­лъыр программэу «Адыгеим и ЛIы­хъужъхэр» зыфиIо­рэм и Общественнэ-лъыплъэкIо совет апэрэу зэхэсыгъо тыгъуасэ иIагъ.

Ащ хэлэжьагъэх АР-м и ЛIышъхьэрэ министрэ­хэм я Кабинетрэ я Адми­нистрацие ипащэу Вла­димир Свеженец, АР-м иминистрэхэм я Кабинет и Тхьаматэ игуадзэу, фи­нансхэмкIэ министрэу Виктор Орловыр, Къэралыгъо Советым — Хасэм и Тхьаматэ игуадзэу, Урысыем и ЛIыхъужъэу Цэй Эдуард, Адыгеим чIыпIэ зыгъэIорышIэжьыпIэхэм адэлэжьэгъэнымкIэ Комитетым итхьама­тэу КIэдыкIое Руслъан, къэралыгъо фондэу «Хэгъэгум иухъумакIохэр» зыфиIорэм ишъолъыр къутамэ ипащэу ПIатIыкъо Аслъан, программэм ипхырыщын хэлэжьэщт гъэсэныгъэм иучреждениехэм ялIыкIохэр.
Iофтхьабзэр пэублэ пса­лъэкIэ Владимир Свеженец къызэIуихызэ, АР-м и ЛIышъхьэу КъумпIыл Мурат ыцIэкIэ шIу­фэс къарихыгъ.
— Непэ тызфызэрэугъоигъэр шъолъыр программэу «Адыгеим и ЛIыхъужъхэр» зыфиIорэм мэзаем и 24-м къыщегъэ­жьагъэу зыхатхэн амал щыIэ зэрэхъугъэм, иIоф­шIэн мэзаем и 25-м зэриублэрэм, ащ игъэцэкIэн епхыгъэ Iофыгъохэм игъэ­кIотыгъэу татегущыIэным афэшI. Мы программэр зытегъэпсыхьагъэр хэу­шъ­хьафыкIыгъэ дзэ операцием хэлэжьагъэхэр нэужкIэ къэралыгъо ыкIи муниципальнэ хэбзэ ­къулыкъухэм, къэралыгъо компаниехэм IэпэIэсэныгъэ, къулайныгъэ ахэлъэу Iоф ащашIэным фэгъэ­хьазырыгъэнхэр ары. Ау программэм хэлэжьэн зы­лъэкIыщтхэр «ветеран» цIэр къызфагъэшъоша­гъэхэу апшъэрэ гъэсэ­ныгъэ зиIэхэр ары. Мы уахъ­тэм УФ-м и УIэшыгъэ КIуачIэхэм къулыкъу ащы­зыхьыхэу джы хэмылэ­жьэ­шъущтхэр шъолъыр программэм ирезерв ха­гъэхьащтых, — хигъэу­нэфыкIыгъ В. Свеженец.
Сэнэхьат ухьазырыныгъэмкIэ шъолъыр програм­мэу «Адыгеим и ЛIы­хъужъхэр» зыфиIорэм ипхырыщын фэгъэзагъэу, чIыпIэ зыгъэIорышIэ­жьы­пIэхэм адэлэжьэгъэнымкIэ АР-м и Комитет итхьа­матэу КIэдыкIое Рус­лъан зэхэсыгъор лъи­гъэкIотагъ.
— УФ-м и Президен­тэу Владимир Путиным къахилъхьэгъэ федеральнэ программэу «ЛIы­хъужъхэм яуахът» зыфиIо­рэр гъэрекIо щегъэжьагъэу агъэцакIэ. ИкIыгъэ илъэсым ащ нэбгырэ мин 44-м ехъумэ, мыгъэ мин 27-рэ фэдизмэ зыща­тхыгъ. Ащ мэхьанэу иIэм зыкъызэриIэтырэм епхыгъэу къэралыгъом ипащэ пшъэрылъ къыгъэуцугъ шъолъырхэри ащ фэдэ проектым игъэцэкIэн фе­жьэнхэу. Ащ къыдыхэ­лъытагъэу, АР-м и ЛIы­шъхьэу КъумпIыл Мурат иунашъокIэ шъолъыр про­граммэу «Адыгеим и ЛIыхъужъхэр» зыфиIорэм ипхырыщын тыфежьагъ, — къыхигъэщыгъ КIэдыкIое Руслъан.
Ащ къызэриIуагъэмкIэ, программэр платформэу «Россия — страна возможностей» зыфиIорэм щыпхыращыщт. Мы уахътэм ехъулIэу ащ нэкIубгъор къыщызэIуахыгъ ыкIи хэушъхьафыкIыгъэ дзэ операцием иветеранхэм «яунэе кабинет» щагъэ­псын амал щыIэ хъугъэ. Непэ къыщегъэжьагъэу гъэтхапэм и 31-м нэс ащ зыщатхын алъэкIыщт, мэ­лылъфэгъум и 1 — 2-м тестированиер акIущт, мэлылъфэгъум и 21-м очнэ едзыгъор къыкIэ­лъыкIощт. Ар резыгъэ­кIокIыщт кIэлэегъаджэхэр Москва щырагъэджагъэх ыкIи а Iофым фэхьазырых. Мэкъуогъум и 27-м нахь мыкIасэу пхыры­кIыгъэхэм яспискэ Об­щественнэ лъыплъэкIо советым щаштэщт. Хэу­шъхьафыкIыгъэ дзэ операцием иветеранхэу къы­хахыхэрэр очнэу респуб­ликэм иапшъэрэ еджапIэхэм Iоныгъом и 1-м къыщегъэжьагъэу аще­джэн­хэ алъэкIыщт.
Зэхэсыгъом икIэух программэм епхыгъэу хэлэжьэщтхэм упчIэу зы­гъэгумэкIыхэрэми щахэплъагъэх.
Iэшъынэ Сусан.