Анахь дэгъухэр къэнэфагъэх
Адыгэ Республикэм ыкIи Пшызэ шъолъыр ащыпсэурэ быслъымэнхэм я ДиндэлэжьапIэ ныбжьыкIэ политикэмкIэ ипрограммэ хахьэу мэзаем и 22-м Мыекъопэ гупчэ мэщытым КъурIан еджэхэрэм азыфагу зэнэкъокъу щыкIуагъ.
Iофтхьабзэм хэлэжьагъэх Адыгэ Республикэм ыкIи Пшызэ шъолъыр ащыпсэурэ быслъымэнхэу ныбжь зэфэшъхьаф зиIэхэр. КъурIан еджэнымкIэ шIэныгъэу аIэкIэлъхэм уасэ фашIыгъ Iимамхэу Кучмэз Айдэмыр, Къэрдэн Назир, Тхьаркъохъо Рэщыд, Мамсыр Мурадин.
Адыгэ Республикэм ыкIи Пшызэ шъолъыр ащыпсэурэ быслъымэнхэм я ДиндэлэжьапIэ къызэрэщаIуагъэмкIэ, зэнэкъокъум хэлэжьагъэхэм зэкIэми шIэныгъэ дэгъу къагъэлъэгъуагъ. Муфтиим игуадзэу, Iимамэу ХъокIо Заурбый текIоныгъэ къыдэзыхыгъэхэм ыкIи хэлэжьагъэхэм шIухьафтынхэр аритыжьыгъэх. Джащ фэдэу КъурIан еджэным фэзыгъэсэгъэхэ кIэлэегъаджэхэм щытхъу тхылъхэр ыкIи ахъщэ шIухьафтынхэр афагъэшъошагъэх.
КIарэ Фатим.