«Еомэ-зэраIорэмкIэ» аушэтыщтых
ЭкономикэмкIэ апшъэрэ еджапIэм ишIэныгъэлэжьхэмрэ Адыгэ къэралыгъо университетымрэ зэкIыгъухэу «Еомэ-зэраIомэ» зыфаIогъэ тест агъэхьазырыгъ.
УблэпIэ классхэм арыс кIэлэеджакIохэм адыгабзэкIэ къеджэнхэмкIэ ама-лэу аIэкIэлъыр уплъэкIугъэным ар тегъэпсыхьагъ. Ащ ишIуагъэкIэ кIэлэцIыкIум ныдэлъфыбзэ еджэнымкIэ ихэукъоныгъэхэр, къызэреджэрэм ипсынкIагъэ ыкIи ар къызэрэгурыIуагъэр бгъэунэфынхэ плъэкIыщт. Тестым адыгэ пшысэхэм якъежьапIэ цIэу фашIыгъ. Ащ изэхэгъэуцон нейропсихологхэм, логопедхэм, кIэлэегъаджэхэм яушэтыныбэ къыдыхэлъытагъ. Непэрэ мафэм ехъулIэу Адыгеим иа 1 — 6-рэ классхэм арыс кIэлэцIыкIуи 120-мэ тестымкIэ ушэтынхэр акIугъах.
Тестым изэхэгъэуцон дэлэжьагъэх экспериментальнэ бзэшIэныгъэмкIэ АКъУ-м и Лабораторие ишIэныгъэ пащэу, экономикэмкIэ апшъэрэ еджапIэм бзэмрэ шъхьэкуцIымрэкIэ и Гупчэ ипащэу Ольга Драгой, АКъУ-м экспериментальнэ бзэшIэныгъэмкIэ и Лабораторие ипащэу Сусанна Макеровар, лабораторием иIофышIэхэу Брыцу Мадинэ, Бгъуашэ Аидэ, Шъхьэлэхъо Еленэ, экономикэмкIэ апшъэрэ еджапIэм иаспирантэу Гумэ Нэфсэт ыкIи АКъУ-м IэкIыб къэралыгъуабзэхэмкIэ ифакультет щеджэхэрэ Хэшх Аидэрэ Къурш Данэрэ.
Шъугу къэдгъэкIыжьын, экспериментальнэ бзэшIэныгъэмкIэ Лабораториер АКъУ-м зыщылажьэрэр 2023-рэ илъэсым къыщегъэжьагъ. «Приоритет 2030» зыфиIорэм ар къыдыхэлъытагъ. Лъэныкъо шъхьаIэу Iоф зыдишIэрэр Урысыем щыпсэурэ лъэпкъхэу ныдэлъфыбзэм изехьакIохэм ашъхьакуцI психо-ыкIи нейробзэшIэныгъэм ылъэныкъокIэ Iоф зэришIэрэр гъэунэфыгъэныр ыкIи нэмыкI лъэныкъохэр.
АКъУ-м ипресс-къулыкъу