Хэгъэгум иухъумакIо и Мафэ ехъулIэу республикэ филармонием щыкIогъэ мэфэкI зэIукIэм хэлэжьагъэх Адыгеим и ЛIышъхьэу КъумпIыл Мурат, АР-м и Къэралыгъо Совет – Хасэм и Тхьаматэу Владимир Нарожнэр, АР-м икъэралыгъо упчIэжьэгъоу ТхьакIущынэ Аслъан, АР-м иминистрэхэм я Кабинет хэтхэр, Къэралыгъо Советым – Хасэм идепутатхэр, федеральнэ ыкIи шъолъыр къулыкъухэм яIэшъхьэтетхэр, муниципалитетхэм япащэхэр, Мыекъопэ гарнизоным идзэкъулыкъушIэхэр, заомрэ IофшIэнымрэ яветеранхэр, апшъэрэ еджапIэхэм, общественнэ организациехэм, дин конфессиехэм ялIыкIохэр.

Хэгъэгум иухъумакIо и Мафэу къэб­лагъэрэм фэшI къэзэрэугъоигъэхэм къафэгушIуагъ Адыгеим и ЛIышъхьэ. Ащ къызэриIуагъэмкIэ, мы мэфэкIым къегъэлъагъо Урысыем идзэ ыкIуачIэ зы­нэсырэр, тихэгъэгу ищынэгъончъагъэ икъэухъумэн фэгъэзэгъэгъэ ыкIи непэ ар зипшъэрылъ пстэуми зэрафэразэр къыхигъэщыгъ.
«Мэзаем и 23-м блэкIыгъэ илъэс­хэм щыIэгъэ заохэм ахэлэжьа­гъэхэр тыгу къэтэгъэкIыжьых, тятэжъхэу ыкIи тятэжъ пIашъэхэу цIыфлъэпкъым итарихъ анахь лъыгъэчъэ заоу къы­хэхъухьагъэм ти Хэгъэгушхо псэемыблэжьэу къыщызыухъумагъэхэм зэрахьэгъэ блэнагъэм лъхъанчэу шъхьащэ фэтэшIы», — къыIуагъ КъумпIыл Мурат.

ТекIоныгъэм ия 80-рэ илъэсэу къэб­лагъэрэм ихэгъэунэфыкIын къытегущыIэзэ, республикэм и ЛIышъхьэ къыхигъэщыгъ Урысыем щыпсэухэрэмкIи, лIы­хъужъ кIэныр зыгъэлъэпIэрэ, Урысыем нацизмэм текIогъэным иIахьэу хишIыхьагъэр зыщызымыгъэгъупшэрэ пстэухэмкIи мы мафэм мэхьанэшхо зэриIэр. Урысыем и Президентэу Владимир Путиным Хэгъэгум иухъумакIо и Илъэсэу ар зыкIигъэнэфагъэми ошIэ-дэмышIагъэ хэлъэу щытэп. ДзэкIолI-интернационалистхэм, чIыпIэхэм къарытэджэгъэ Iэшэ зэIуупIэныгъэхэм ахэлэжьагъэхэм, илъэс зэфэшъхьафхэм Урысыем ищынэгъончъэн къэзыухъумэгъэ пстэуми зэрафэразэхэм ишыхьатэу ар щыт.

Анахьэу къыхигъэщыгъэхэр хэушъхьафыкIыгъэ дзэ операцием хэлажьэхэу мы мафэхэм хэгъэгум исуверенитет къэзыухъумэхэрэр ары. Ахэм теубытагъэ ахэлъэу, зышъхьамысыжьхэу, ТекIоныгъэм яцыхьэ телъэу япшъэрылъ агъэцакIэ.

«ТикIалэхэм лъэшэу тарэгушхо ыкIи тафэраз. Ахэм ыкIи яунагъохэм тынаIэ атедгъэтыныр, тафэгумэкIыныр типшъэрылъ къодыеп, зыпсэ емыблэжьхэу Урысыем инеущырэ мафэ пае блэнагъэ зезыхьэхэрэм апа­шъхьэкIи ар тэ къыттефэу щыт», — къыIуагъ КъумпIыл Мурат.
Республикэм и ЛIышъхьэ къызэрэхигъэщыгъэмкIэ, дзэкъулыкъушIэхэу заом Iутхэм ыкIи ахэм яунагъохэм арысхэм IэпыIэгъу ятыгъэнымкIэ республикэм Iофтхьэбзабэ щызэрахьэ. Хэгъэгум и Президент кIэщакIо зыфэхъугъэ программэу «ЛIыхъужъхэм яуахът» зыфиIорэм къыдыхэлъытагъэу хэушъхьафыкIыгъэ дзэ операцием иветеранхэм IэпыIэгъу ятыгъэным ЛIышъхьэр къыщыуцугъ. А программэм тегъэпсыхьагъэу республикэми «Адыгеим и ЛIы­хъужъхэр» зыфиIорэ шъолъыр программэр щагъэцакIэу рагъэжьэщт. Къэралыгъо ыкIи муниципальнэ хэбзэ къулы­къухэм Iоф ащашIэным хэушъхьафыкIыгъэ дзэ операцием иветеранхэр фэ­гъэ­хьазырыгъэнхэм телъытагъэу ар щы­тыщт.

КъумпIыл Мурат къызэгущыIэм джащ фэдэу къыхигъэщыгъ ветеран организациехэм, волонтерхэм, патриот клубхэм, юнармейцэхэм, лъыхъокIо отрядхэм мэхьанэу яIэр. Нафэу зэрэщытымкIэ, тарихъ шIэжьыр ыкIи тиобществэ изыкIыныгъэ гъэпытэгъэнымкIэ ахэм яшIогъэшхо къэкIо. ХэушъхьафыкIыгъэ дзэ операцием хэлажьэхэрэм япшъэрылъхэр агъэцакIэхэзэ лIыхъужъныгъэу зэрахьагъэм пае Адыгеим и ЛIышъхьэ ирэзэныгъэ тхылъ афагъэшъошагъ Росгвардием и ГъэIорышIапIэу Адыгэ Респуб­ликэм щыIэм иподразделение гъэнэфагъэхэм ядзэкIолIхэм.
Адыгеим и ЛIышъхьэ юбилейнэ медалэу «1941 – 1945-рэ илъэсхэм щыIэгъэ Хэгъэгу зэошхом ТекIоныгъэр къыз­щыдахыгъэм ия 80-рэ илъэс» зыфиIорэри къаритыжьыгъ. Урысыем и Президент и Указ тетэу ар афагъэшъошагъ Хэ­гъэгу зэошхом хэлэжьагъэу Николай Бурдун, Ленинград къызадзыхьэ лъэхъаным ащ дэсыгъэхэ Людмила Абесалашвили ыкIи Зоя Корытинам.
Ащ нэужым АР-м и Къэралыгъо Совет – Хасэм и Тхьаматэу Владимир Нарожнэр Iофтхьабзэм хэлажьэхэрэм къафэгушIуагъ. Хэгъэгум иухъумакIо и Мафэ фэгъэхьыгъэ зэIукIэм ыуж мэфэкI концерт къатыгъ.

АР-м и ЛIышъхьэ ипресс- къулыкъу къытырэ къэбархэмкIэ Тхьаркъохъо Сафыет.