2025-рэ илъэсыр Хэгъэгум иухъумакIо и Илъэсэу Урысыем щагъэнэфагъ. Ти Хэгъэгу къэзыухъумэгъэ тятэжъхэм ыкIи тятэжъ пIашъэхэм ялIыхъужъныгъэ къыткIэхъухьэрэ лIэужхэм ащымыгъупшэным фэшI АР-м Iофтхьэбзабэ щызэхащэ.

ЕджакIохэм япатриотическэ пIуныгъэ фэгъэхьыгъэ зэIукIэу Мыекъопэ Гупчэ тхылъеджэпIэ зэхэтым ия 2-рэ къутамэ зэхищагъэм хэлэжьагъ АР-м и Къэралыгъо Совет — Хасэм и Тхьаматэ игуадзэу, Урысыем и ЛIыхъужъэу Цэй Эдуард.
ТхылъеджапIэм ипащэу УдыкIэко Ларисэ ипэублэ гущыIэ ЛIыхъужъым ищыIэныгъэ гъогу къыриIотыкIыгъ, лIы­хъужъхэм ацIэ тщыгъупшэ зэрэмыхъущтыр хигъэунэфыкIыгъ.
ЗэкIэмэ анахь тын лъапIэу къырагъэб­лэгъэгъэ хьакIэм иIэр «Урысыем и ЛIыхъужъ» зыфиIорэр ары. ЛIыхъужъым илъэс пчъагъэ хъугъэу ныбжьыкIэхэм патриотическэ пIуныгъэ ягъэгъотыгъэным иIахьышхо хешIыхьэ: дзэм къулыкъур щызыхьыщтхэм, студентхэм, кIэлэеджа­кIохэм заIуегъакIэ.
— Мыгъэ, Хэгъэгу зэошхор заухыгъэр илъэс 80 зыщыхъурэм, дзэкIолIхэу, офицерхэу тидунай фашизмэм щызыухъумагъэхэм яшIэжь къызэтедгъэнэным, дгъэ­лъэпIэным тынаIэ нахь тедгъэтыным тыпылъ. Ти Хэгъэгу ишъхьафитыныгъэ зыпсэ фэзытыгъэ дзэкIолIхэм ацIэкIэ илъэс къэс зэхащэрэ Iофтхьабзэхэр лIэужыкIэм ищыкIагъэх. Непи тидзэ­кIолIхэм хэушъхьафыкIыгъэ дзэ операцием ядзэ пшъэрылъхэр щагъэцакIэх. Ащ фэдэ кIалэхэр Урысыем еIэфэхэ пыихэр къызэрэттемыкIощтхэм тицыхьэ телъ. НыбжьыкIэхэм непэ анахь пшъэ­рылъ шъхьаIэу зыфэжъугъэуцужьын фаер шIэныгъэ куу зэжъугъэгъотыныр ыкIи шъуипсауныгъэ жъугъэпытэныр ары. ЛIыхъужъхэр тыгъосэрэ тарихъым хэхьагъэх, ныбжьыкIэхэр неущырэ мафэм илIыхъужъынхэ фае, — къыIуагъ Цэй Эдуард.
— ТизэолIхэмрэ тиветеранхэмрэ ныбжьыкIэхэм япIункIэ, я Хэгъэгу фэшъыпкъэхэу, цIыфыгъэ шэпхъэ дахэхэм арыгъуазэхэу щытынхэмкIэ щысэшIух. ТхылъеджапIэм Iофышхоу ыгъэцакIэрэр тарихъ шIэжьым икъэухъумэнкIэ, хэгъэгупсэхэу, къэралыгъом къырыкIощтымкIэ пшъэдэкIыжь зэрахьырэр къагурыIоу ныбжьыкIэхэр пIугъэнхэмкIэ IэпыIэгъу­шхоу щыт, ахэм «тхьашъуегъэ­псэу» ясIомэ сшIогъу, — къыIуагъ еджа­кIохэр зэIукIэм къэзыщэгъэ кIэлэегъа­джэу Бэчыр Нуриет.
Къэралыгъом щыпсэурэ нэбгырэ пэпчъ и Хэгъэгу къыухъумэныр ипшъэ­рылъ. А пшъэрылъыр агъэцакIэзэ лIыгъэ зезыхьэхэрэр хэткIи щысэтехыпIэх.
Лъэпшъыкъо Фатим.
Сурэтыр авторым ий.