Хэгъэгум иухъумакIохэм я Мафэ ипэгъокIэу Мыекъуапэ щыщ ныб­жьыкIэ 20-мэ паспортхэр аратыжьыгъ. Ащ фэгъэхьыгъэ Iофтхьабзэр мэфэкI шIыкIэм тетэу щыкIуагъ фондэу «Хэгъэгум иухъумакIохэр» зыфиIорэм ишъолъыр къутамэу Адыгеим щыIэм.

«Урысыем тырицIыф» зыфиIорэ Iофтхьабзэм кIэщакIо фэхъугъ ныбжьыкIэ политикэмкIэ Мые­къопэ отделыр. «Движение первых» хэтхэр ащкIэ IэпыIэгъу хъугъэх. ЗэхэщакIохэм къызэраIуагъэм­кIэ, Урысыем ицIыфэу зэрэщытхэр къэзыушыхьатырэ тхылъхэр зэратыжьыгъэ ныбжьыкIэхэр «Движение первых» хэтых, кIэлэеджакIох, еджэнымкIэ, спортымкIэ ыкIи творчествэмкIэ гъэхъэгъэшIухэр зышIыгъэх, хэушъхьафыкIыгъэ дзэ операцием хэлажьэхэрэм ялъфыгъэх.
— Урысыер, Адыгеир, илъэпкъ шIу зылъэгъурэ хэкупсэ цIыфхэр зэрэшъу­хэкIыщтхэм сицыхьэ телъ. Шъуигъэ­хъагъэхэмкIэ джырэ тарихъыр тхыгъэ зэрэхъурэр зыщышъумыгъэгъупш. Шъхьадж къыдэхъурэмкIэ къэралыгъом ихэхъоныгъэ иIахьышIу хелъхьэ, — ариIуагъ ныбжьыкIэхэм Мыекъопэ къэлэ администрацием ипащэ игуадзэу Юрий Томчак.
Сурэтыр: фондэу «Хэгъэгум иухъумакIохэр»