Бэрэ зыкIэхъопсыгъэхэ текIоныгъэмкIэ «АГУ-Адыифым» тигъэгушIуагъ.

ГандболымкIэ Суперлигэм хэт бзылъфыгъэ командэхэм ячемпионат ипэшIорыгъэшъ уцугъо иятIонэрэ Iахь командэу «АГУ- Адыифыр» къалэу Ижевскэ икомандэу «Университетым» щыIу­кIагъ. ЗэIукIэгъур щыкIуагъ Кобл Якъубэ ыцIэ зыхьырэ спорт ордэунэм.
«АГУ-Адыиф» (Мыекъуапэ) – «Университет» (Ижевск) – 36:27.
Мы командэхэр ешIэгъу лъэхъа­ным тIогъогогъо зэIукIагъэх. ТIумкIи – тикъалэ зыщызэIокIэхэми, хьакIэу зыщэтхэми – тикомандэ текIоныгъэ къыдихыгъ. Чемпионатым ишапхъэхэм къызэрэдалъытэрэмкIэ, апэрэ пэшIорыгъэшъ уцугъом ыуж командэхэр купитIоу агощыгъэх: а 1-рэ чIыпIэм къыщегъэжьагъэу я 6-м нэс зыубытыгъэхэр, адрэхэр – купэу «Б-м». ЕшIэгъуи 10-м язэфэхьысыжьхэмкIэ купэу «Б-м» хэхьэрэ командитIу анахь дэгъоу къыхахыхэрэр а 1 – 8-рэ чIыпIэхэр зыIыгъхэм ахэфэнхэм пае зэнэ­къо­къущтых. Адрэхэр я 9 – 11-рэ чIыпIэхэм афэбэнэщтых. Мые­къопэ командэр а 1 – 8-рэ чIыпIэхэм афэбэнэн ылъэкIыщтэп, апэрэ командитIур бэкIэ ыпэ итых.
«Университетым» тикомандэ дыриIэгъэ зэIукIэгъум мэхьанэшхо иIагъ, къытекIомэ, «АГУ- Адыифым» ыубытырэ я 10-рэ чIыпIэр ытIупщын фаеу хъущтыгъ. ЗэIукIэгъум иапэрэ Iахь типшъа­шъэхэм къахьыгъ 19:9-у. КъэлэпчъэIутэу Людмила Баскаковар дэгъу дэдэу ешIагъ, гъогогъу 16-у къэлапчъэм къызэрэдэуагъэхэм щыщэу 7-р зэкIидзэжьын ылъэ­кIыгъ ыкIи командэм игандболисткэ анахь дэгъоу къыхагъэщыгъ. Джащ фэдэу щытхъу къы­хьыгъ Кобж Зареми, ащ Iэгоуи 7 «Университетым» икъэлапчъэ дидзагъ. Нэужым типшъашъэхэм яешIакIэ тIэкIу къагъэлэнлагъэми, текIоныгъэр яеу зэIукIэгъур аухыгъ.
«АГУ-Адыифыр» мэзаем и 25-м командэу «Луч» (Москва) Мые­къуапэ щыIукIэщт. Пчыхьэм сыхьатыр 6-м ешIэгъур аублэщт.
Командэхэр зыдэщыт чIыпIэхэр ыкIи очко пчъагъэу рагъэкъугъэр:
«Динамо — Синара» (Волгоград) — 21

2. «Звезда» (Звенигород) — 18
3. «Луч» («Москва») — 13
4. «АГУ-Адыиф» (Мыекъуапэ) — 6
5. «Университет» (Ижевск) — 0.