Дунэе конференциер Мыекъуапэ щэкIо
Хэкурыс цIыф лъэпкъхэм абзэхэм яилъэсипшIэу кIорэм (2022 — 2032-рэ илъэсхэр) къыхиубытэу я VII-рэ Дунэе шIэныгъэ-методологическэ конференцие мы мафэхэм Мыекъуапэ щэкIо. «Глобализацием илъэхъан ныдэлъфыбзэр къэухъумэгъэныр ыкIи хэхъоныгъэ егъэшIыгъэныр: шIыкIэхэр ыкIи технологиехэр» — джары шIэныгъэлэжьхэм язэхахьэ зэреджагъэхэр.
АР-м и ЛIышъхьэу КъумпIыл Мурат ишIуфэс гущыIэхэр шIэныгъэлэжьхэм афигъэзагъ, гъэхъагъэ хэлъэу Iоф ашIэнэу афиIуагъ.
Iофтхьабзэм изэхэщакIо Дунэе Адыгэ Академиер, республикэ общественнэ зэхахьэу «Адыгэ Хасэр» ыкIи гуманитар ушэтынхэмкIэ Адыгэ республикэ институтэу КIэрэщэ Тембот ыцIэ зыхьырэр.
Адыгеим ишIэныгъэлэжьхэм анэмыкIэу Къэбэртэе-Бэлъкъарым, Къэрэщэе-Щэрджэсым, Абхъазым, Къалмыкъ Республикэм, Темыр Осетием – Аланием, нэмыкI шъолъырхэми къарыкIыгъэ хьакIэхэр конференцием хэлажьэх. КъэмыкIошъугъэхэм апае онлайн шIыкIэр агъэфедэзэ Iэнэ хъураехэр, пленарнэ зэхэсыгъохэр зэхащэх. Ныдэлъфыбзэхэм якъэухъумэнкIэ шIыкIэ-амалыкIэу щыIэхэм, проектнэ IофшIэнхэр зэхэщэгъэнхэм мэхьанэу иIэм, сабыим ипIункIэ ныдэлъфыбзэм мэхьанэу, кIуачIэу иIэм, непэрэ мафэхэм бзэм зэхъокIыныгъэу фэхъухэрэм, лъэпкъ цIыкIухэм абзэхэр къэухъумэгъэнхэм иамалхэм ыкIи нэмыкIыбзэхэм къахахырэ гущыIэхэм ныдэлъфыбзэм зэхъокIыныгъэу фашIыхэрэм, хэкурыс лъэпкъхэм абзэ еджапIэхэм зэращызэрагъашIэрэм, бзэшIэныгъэм лъэпкъ культурэр зэрэхэлажьэрэм, нэмыкI лъэныкъуабэхэми шIэныгъэлэжьхэр анэсыщтых. Конференциер зэрэкIуагъэм фэгъэхьыгъэ къэбар игъэкIотыгъэ «Адыгэ макъэм» изичэзыу къыдэкIыгъо къыхиутыщт.