Пэтхъу-Iутхъум ыгъэсымэджэрэ еджакIо-хэм япчъагъэ зэрэхахъорэм ыпкъ къикIэу республикэм иеджапIэхэм ащыщхэр пэIудзыгъэ шIыкIэм тетэу егъэджэгъэнхэм техьагъэх.

Зыхэм класс шъхьафхэр унэхэм арагъэтIысхьагъэх, еджа­пIэу зэфашIыпагъэхэри ахэтых. ГущыIэм пае, мы тхьамафэм зэфэшIыгъэхэм ащыщ Адыгэ республикэ гимназиер. КIэлэеджакIохэм япроцент 30-м нахьыбэр сымаджэу загъэунэфым, еджапIэр зэрэщытэу пэIудзыгъэ егъэджэным техьагъ.
АР-м исанитарнэ къулыкъу шъхьаIэ къызэритырэмкIэ, блэкIыгъэ тхьамафэм къыкIоцI нэбгырэ 2251-рэ шъолъырым щысымэджагъ. Тхьамэфэ къэгъэлъэгъонхэм ишапхъэхэм ар процент 19,6-кIэ къяхъугъ. Анахьэу сымаджэр зыщыбэр Тэхъутэмыкъое районымрэ Мыекъуапэрэ. Мыекъуапэ пштэмэ, гриппыр ыкIи пэтхъу-Iутхъур нэбгырэ 298-мэ къяутэкIыгъэу агъэунэфыгъ. Ащ ыпэрэ тхьамафэм икъэгъэлъэгъонхэм ягъэ­пшагъэмэ, ар процент 17,6-кIэ нахь макI. НахьыбэрэмкIэ къяузырэр гриппэу «А-р» ыкIи «В-р». Ахэм янэшанэхэр зэхьыщырых: плъыр-стыр инымрэ чъыIалIэмрэ.
Анцокъо Ирин.