ЦIыфхэм IэпыIэгъу афэхъугъэнымкIэ Штабэу Адыгэ Республикэм щызэхэщагъэм лIыхъужъныгъэм исыхьат щыкIуагъ.

Iофтхьабзэм хэлэжьагъэх Адыгэ республикэ гимназием икIэлэеджакIохэр, «Гвардие НыбжьыкIэм» хэтхэр, «Юнармием» иIофшIэн хэлажьэхэрэр. КIэлэеджакIохэм къафаIотагъ прокуратурэм гъэпсыкIэу иIэм, ащ итарихъ ыкIи ипшъэрылъ шъхьаIэхэм афэгъэхьыгъэу. Джащ фэдэу Хэ­гъэгу зэошхом илъэхъан Урысыем щыпсэурэ цIыфхэм лIыхъужъныгъэу зэрахьагъэм фэгъэхьыгъэу хъугъэ-шIэгъэ зэфэшъхьафхэм ягугъу афашIыгъ.
Iофтхьабзэр зезыщагъэхэр къалэу Мыекъуапэ ипрокурор иIэпыIэгъу шъхьаIэу Пщыпый Фатим, Мыекъопэ къэралыгъо технологическэ университетым ипрофессорэу, социальнэ технологиехэмкIэ, шъолъыр пэщэныгъэ зехьэгъэнымкIэ Академием итхьаматэу Азэщыкъ Геннадий, «Гвардие НыбжьыкIэм» и Адыгэ шъолъыр къутамэ хэтэу Лиовник Багдасарян.
Азэщыкъ Геннадий кIэлэеджакIохэм къафиIотагъ лIыхъужъ­ныгъэ зыщызепхьан плъэкIыщтым охътэ гъэнэфагъэ иIэу зэрэщымытым фэгъэхьыгъэу. Уи Хэгъэгу къэуухъумэныр анахь пшъэрылъ шъхьаIэу нэбгырэ пэпчъ иIэхэм ащыщ. Непэ, дунаим зэхъокIыныгъэ ыкIи гумэкIыгъо инхэр къыз­щытехъухьэхэрэм, а гущыIэхэм мэхьанэу яIэм джыри нахь хэхъо. Заор зыщыкIорэ чIыпIэм лIыхъужъныгъэ щызепхьан зэрэплъэкIыщтым имызакъоу, культурэр, шэн-хабзэхэр гъэпытэгъэнхэмкIэ, обществэм зыпкъитыныгъэ хэлъынымкIэ зекIокIэ-шIыкIэхэм ар къахэщын ылъэкIыщт. ЗэкIэми зэдытиIофым нэбгырэ пэпчъ иIахь горэ хишIыхьаныр иамал къыхьыщт. Тыкъэзыуцухьэрэ цIыфхэм IэпыIэгъу ятыгъэным, волонтер IофшIэным хэлэжьэгъэным, шъыпкъэр къончагъэ хэлъэу къагъэлъэгъоным зэрэфежьэхэрэм упэуцужьыным ахэр къыделъытэх.
Азэщыкъ Геннадий ищыIэныгъэ къыхэхыгъэ щысэхэр кIэлэеджакIохэм къафихьыгъэх. Сыд фэдизэу цIыфыр чIыпIэ зэжъу ифагъэми, къызхэкIыгъэр, ылъапсэ зыщигъэгъуп­шэхэ хъущтэп, тишъхьафитыныгъэ зыпсэ фэзыгъэтIылъыгъэхэм яшIэжь ыгъэлъэпIэн фае. ЛIыхъужъныгъэр гум къыщежьэ, арышъ, къыткIэхъухьэхэрэм къагурыIон фае: уи Хэгъэгу пае шIоу пшIэрэр зэкIэ неущ ар зыфэдэщтым фэлэжьэщт.
ИкIэухым къалэу Мыекъуапэ ипрокуратурэ ыгъэхьазырыгъэ памяткэу хэбзэгъэуцугъэм къыдилъытэрэ лъэныкъохэр къизыIотыкIыхэрэр кIэлэеджакIохэм афагощыгъэх.