IэкIыб къэралыгъохэм къарыкIыгъэ цIыфхэу Урысыем игражданствэ зиIэ хъугъэхэр дзэ учетым хэуцонхэмкIэ япшъэдэкIыжь, кощын ыкIи административнэ хэбзэгъэуцугъэр зэрагъэцакIэрэр ауплъэ­кIугъ. Iофтхьабзэр УФ-м и Следственнэ комитет идзэ следственнэ отделэу Мыекъопэ гарнизоным щыIэмрэ рес­публикэ дзэ комиссариатымрэ рагъэкIокIыгъ. Ахэм ягъуса­гъэх Урысые гвардием идзэ къулыкъу и ГъэIорышIапIэу АР-м щыIэм илIыкIохэр.

Мыщ фэдэ уплъэкIунхэр, зэрэхабзэу, Мыекъуапэ иобщественнэ ыкIи псэолъэшI IофшIэнхэр зыщыкIохэрэ чIыпIэхэм, бэдзэр шIыпIэхэм, шхапIэхэм ащызэхащэх.
Дзэ следователэу, лейтенантэу Денис Груздевым къызэриIуагъэмкIэ, пшъэрылъ шъхьаIэр мы купым хэхьэрэ цIыфхэм ядзэ пшъэрылъ фэгъэхьыгъэ ыкIи кощын хэбзэгъэуцугъэхэр зэрагъэцакIэхэрэр уплъэкIугъэнхэр ары.
— 2024-рэ илъэсым шэкIогъум и 1-м къыщегъэжьагъэу мы уахътэм нэс къалэу Мыекъуапэ щызэхащэгъэ рейдхэр окIофэхэ нэбгырэ миным ехъу ауплъэкIугъ, ахэм ащыщэу нэбгырэ 924-р дзэ учетым хэмыуцуагъэ­хэу къычIэкIыгъ. Хэбзэгъэуцугъэу зекIорэр гъэцэкIэгъэным фэшI ахэр дзэ комиссариатым къырагъэблэгъагъэх, — хигъэунэфыкIыгъ Д. Груздевым.
Урысые хэбзэгъэуцугъэхэр агъэцэ­кIэнхэу зэрэщытым ыкIи ахэр заукъо­хэкIэ пшъэдэкIыжьэу арагъэхьыщтым афэгъэхьыгъэ зэдэгущыIэгъухэр къэралыгъо къулыкъухэм ялIыкIохэу рейд­хэм ахэлажьэхэрэм адашIых IэкIыб къэралыгъохэм къарыкIыгъэхэу Адыгеим щыпсэунхэу къэкIуагъэхэм. Джащ фэдэу ахэр зэзэгъыныгъэкIэ къулыкъу ахьыным зыкIатхэхэкIэ, фэгъэкIотэнэу яIэн ылъэкIыщтхэр къафаIуатэ.
— Адыгеим идзэ учет IэкIыб къэралыгъохэм къарыкIыгъэу гражданствэ зиIэ нэбгырэ 847-рэ хэт. Ащ щыщэу нэбгырэ 18-р УIэшыгъэ КIуачIэхэм къулыкъу ащахьынэу зэзэгъыныгъэм кIэтхагъэх, — къыхигъэщыгъ Денис Груздевым.
ШъушIэным пае
IэкIыб къэралыгъохэм къарыкIыхи псэупIэкIэ Урысыер къыхэзыхыгъэхэу гражданствэ зэратыгъэхэр дзэ учетым зыхэмыуцохэкIэ урысые паспортыр аIахыжьыщт. Мыщ фэгъэхьыгъэ федеральнэ хэбзэгъэуцугъэм гъэтэрэзыжьынхэр 2023-рэ илъэсым гъатхэм фашIыгъэх.
Джащ фэдэу икIыгъэ илъэсым, гъэ­мафэм, федеральнэ хэбзэгъэуцугъэхэу «Дзэ пшъэрылъым ыкIи дзэ къулы­къум афэгъэхьыгъ» зыфиIорэм ия 4-рэ статья ыкIи «УФ-и игражданствэ фэгъэхьыгъэм» ия 22-рэ статья зэхъо­кIыныгъэхэр афашIыгъ. Ахэм къызэрэдалъытэрэмкIэ, гражданствэ зыгъэпсыхэрэм якъэбар хэгъэгу кIоцI IофхэмкIэ Министерствэм икъулыкъу­хэм дзэ комиссариатхэм аIэкIагъэхьанхэ фае. Нэужым дзэ учетым епхыгъэ документхэр агъэкIэжьынхэм фэшI а къэтынхэр хэушъхьафыкIыгъэ информационнэ къэкIуапIэм рагъахьэх.
Iэшъынэ Сусан.